26 декабрь куни Транспорт вазири Илҳом Махкамов Афғонистон транспорт ва фуқаро авиацияси вазири вазифасини бажарувчи Ҳамидулло Охунзода бошчилигидаги делегация вакиллари билан учрашув ўтказган эди.
Учрашувда томонлар транспорт ва логистика соҳасидаги ҳамкорлик алоқаларини ривожлантириш мақсадида,
- автомобиль ташувларида ундириладиган йиғим ва тўловларни паритет асосида ундирилишини таъминлаш;
- Афғонистон ҳудуди орқали транзит ҳамда икки томонлама ташувларни ривожлантириш;
- темир йўл ташувларидаги тариф ставкаларига имтиёзлар тақдим этиш;
- «Ўзбекистон – Афғонистон – Покистон» темир йўл қурилиши лойиҳасини жадаллаштириш билан боғлиқ масалаларни муҳокама этишди.
Транспорт вазири Илҳом Маҳкамов Афғонистон транспорт ва фуқаро авиацияси вазири вазифасини бажарувчи Ҳамидулло Охунзода бошчилигидаги делегация вакиллари билан ўтказган учрашув якунлари бўйича муҳим келишувларга эришилди.
Хусусан, ўзбек миллий ташувчилари учун транзит ва Афғонистоннинг бошқа ҳудудларига ташувлар жараёнида ўрнатилган чеклов бекор қилинди.
Шунингдек, 2024 йилдан бошлаб томонлар халқаро автомобиль ташувларида ундириладиган йиғим ва тўловларни паритет асосида ўрнатиш бўйича аниқ мақсадлар белгилаб олинди.
