Бу ҳақда туман ҳокимлиги ахборот хизмати маълум қилди.
Туман тиббиёт бирлашмаси маълумотларига кўра, соат 9:00 дан 16:00 гача бўлган вақт ичида 3 ёшдан 7 ёшгача бўлган 37 нафар бола иситма кўтарилиши, кўнгил айниши, қорин оғриғи, ич кетиши ва ҳолсизлик каби шикоятлар билан шифокорларга мурожаат қилган.
Эпидемиологик суриштирув натижасида аниқланишича, болалар 8 октябрь куни ўзлари тарбияланаётган таълим ташкилотида биокефир, сир ва сариёғ каби маҳсулотларни истеъмол қилган. Шундан кейин уларда ошқозон-ичак тизими билан боғлиқ оғриқли ҳолатлар юзага келган. Дастлабки текширувлар асосида “ўткир диарея” ташхиси қўйилиб, болалар стационарда тиббий ёрдам олмоқда.
Жиззах вилояти санитария-эпидемиологик осойишталик ва жамоат саломатлиги бошқармасининг дастлабки хулосасига кўра, озиқ-овқат маҳсулотларини ташиш, сақлаш ва ишлов беришда санитария қоидаларига риоя этилмаган. Бу эса болалар соғлиғига салбий таъсир кўрсатган бўлиши мумкин.
Ҳозирда Фориш туман прокуратураси томонидан Ўзбекистон Республикаси Жиноят кодексининг 205-моддаси 1-қисми билан жиноят иши қўзғатилган. Мазкур ҳолат бўйича суриштирув ишлари олиб борилмоқда.
