Тадбирда Ўзбекистонда тўқимачилик соҳасини ривожлантириш бўйича кўрилаётган изчил чора-тадбирлар, хусусан, кластер тизимини яратиш, соҳага оид турли кўргазмалар ўтказиш, экспортчиларни қўллаб-қувватлаш йўлидаги саъй-ҳаракатлар ҳақида маълумот тақдим этилди.
Тўқимачилик маҳсулотларини жаҳон бозорига экспорт қилиш, соҳага хорижий сармояларни жалб этиш йўлида амалга оширилаётган кенг кўламли ишлар ҳақида сўзлаб берилди. Ўзбекистонга Европа Иттифоқи преференциялар бош тизими (GSP+) бўйича бенефициар мамлакат мақомининг берилиши ҳамда «Cotton Campaign» бойкотининг бекор қилингани тўқимачилик соҳасида халқаро ҳамкорлик учун янги имкониятлар эшигини очганига урғу берилди.
Франция тўқимачилик саноати уюшмаси (UIT) экспорт комиссияси президенти Беатрис Брандт «Ўзтўқимачиликсаноат» уюшмаси билан 2022 йилда имзоланган Англашув меморандуми асосида фаол ҳамкорлик қилинаётганини таъкидлади.
У Ўзбекистонга 2022 йил октябрь ойида Франция тўқимачилик саноати уюшмаси бошчилигидаги бизнес миссия самарали ташкил қилингани ва республика тўқимачилик соҳасининг ишлаб чиқариш салоҳияти билан яқиндан танишганини ҳамда ушбу сафар асосида ўзаро ҳамкорликнинг устувор йўналишлари белгилаб олинганини қайд этди.
Хусусан, «UIT» Ўзбекистон компаниялари маҳсулотларини Францияга экспорт қилиш, Европа бозорига кириш бўйича стратегия ишлаб чиқишга кўмаклашиш, стилист ва дизайнерларнинг малакасини ошириш курсларини ташкил этиш ҳамда Францияда тўқимачилик ва мода соҳасида фаолият юритувчи ташкилотлар билан алоқаларни ривожлантиришга ёрдам беришга тайёрлигини таъкидлади.
«Premiere Vision» кўргазмаси президенти Филипп Паске Ўзбекистонда ҳаётга татбиқ этилаётган тизимли ўзгаришлар, республиканинг улкан ишлаб чиқариш салоҳиятига эътибор қаратди. Мамлакатнинг GSP+ бенефициар мақомини олиши тўқимачилик корхоналарининг таниқли брендларнинг глобал таъминот занжирларига қўшилишига янги имкониятлар яратганини алоҳида таъкидлади.
Шу нуқтаи назардан, у бугун француз брендлари Ўзбекистонга қизиқиш билдираётганини, бунга яққол мисол тарзида учта ўзбек компанияси («Ideal Garments», «BST», «Osborne») «Premiere Vision» кўргазмаси ташкилий қўмитаси танлов комиссиясидан муваффақиятли ўтгани ва унда иштирок этаётганини урғулади. «Ишончим комилки, Ўзбекистон компанияларининг сони бизнинг кўргазмамизда тобора ошиб бораверди», — деди Филипп Паске.
Тадбир доирасида Франциялик ҳамкорлар билан Ўзбекистон тўқимачилик саноатини кенг тарғиб этиш, маҳсулот экспорт географиясини янада кенгайтириш, Франция брендлари ва ритейлерлари, соурсинг компанияларини жалб этишда яқиндан ҳамкорлик қилишга келишиб олинди, деб хабар беради «Дунё» АА.
