Қўшма инвестиция лойиҳаларини амалга оширишда компанияларнинг иштирок этиш истиқболларини муҳокама қилишга бағишланган ушбу музокараларда мамлакатимиз манфаатдор вазирлик ва идоралари раҳбарлари ҳам иштирок этди.
Хусусан, «Alstom» компаниясининг бош директори Анри Пупар-Лафарж билан суҳбат чоғида шаҳар жамоат транспортини ташкил этиш соҳасида компаниянинг ечимларини жорий қилиш имкониятлари муҳокама қилинди.
Маълумот учун: 1928 йилда ташкил этилган Alstom темир йўл транспорти ишлаб чиқарадиган энг йирик машинасозлик компанияларидан биридир. Унинг штати тахминан 74 минг кишини ташкил этади. Шунингдек, компания транспорт ва йўловчилар оқимини рақамли бошқариш бўйича ечимларни ишлаб чиқади. Компания дунёнинг 70 мамлакатида амалга оширган сотув савдо айланмасининг ҳажми 2021 йилда 15,5 миллиард еврони ташкил этди.
Учрашув доирасида томонлар янги лойиҳаларнинг техник-иқтисодий параметрларини батафсил ишлаб чиқиш бўйича қўшма саъй-ҳаракатларни давом эттиришга келишиб олдилар.
Voltaliya компанияси бош ижрочи директори Себастян Клерк билан Ўзбекистонда қуёш ва шамол электр станцияларини қуриш бўйича бир қатор инвестиция лойиҳаларини амалга оширишда компаниянинг иштирок этиш истиқболлари муҳокама этилди.
Маълумот учун: Voltaliya 2005 йилда ташкил этилган. Компания объектларининг умумий қуввати 1,9 ГВт ва истиқболли лойиҳалар портфели 10,7 ГВт дан ошади. Компания дунёнинг 20 мамлакатида фаолият олиб боради.
Мулоқот давомида компаниянинг бутун дунё бўйлаб электр энергиясини ишлаб чиқариш қувватларини яратиш билан бирга объектларнинг ишончлилиги ва иш сифатининг юқори даражасини таъминлаш бўйича катта тажрибаси таъкидланди. Компания раҳбарияти, ўз навбатида, Ўзбекистонда ваколатхона очиш ва муқобил энергетика объектларини қуришга қизиқиш билдирди.
Orano Mining компаниясининг Бош директори Николя Мейс билан учрашувда томонлар инвестиция ҳамкорлигини кенгайтиришнинг ҳозирги ҳолати ва истиқболларини конструктив тарзда муҳокама қилдилар.
Энергетика саноати учун ускуналар ишлаб чиқаришга ихтисослашган Orano компанияси раҳбарияти ўзаро ҳамкорликни янада ривожлантиришга қизиқиш билдиряпти. Шу муносабат билан аниқ лойиҳаларни муҳокама қилиш жараёнида Ўзбекистон томони мамлакатимизда қўшма лойиҳаларни амалга оширишда инвесторларга тўлиқ ёрдам кўрсатишга тайёрлигини таъкидлади, деб хабар беради Инвестициялар ва ташқи савдо вазирлиги матбуот хизмати.
