Учрашув давомида томонлар мактабгача таълим соҳасидаги ҳамкорлик истиқболларини, шунингдек, мактабгача таълим соҳасида таълим жараёнини рақамлаштириш билан боғлиқ янги инновацион лойиҳаларни амалга ошириш юзасидан амалга оширилиши лозим бўлган кенг кўламли масалаларни муҳокама қилди.

Учрашув доирасида Пучон университети вакиллари бир қатор тақдимотларни тақдим этдилар, хусусан:

– Пучон университети «Видео ва ўйин контенти» факультети профессор-ўқитувчилари ва талабалари томонидан ишлаб чиқилган Ўзбекистон Республикаси мактабгача таълим вазирлиги учун туморлар, тимсоллар, персонажлар ва анимациялар тақдимоти;

– Мега олам платформаси асосида учрашувлар ва йиғилишлар ўтказишга қаратилган виртуал маконнинг тақдимоти;

– таълим дастурларини амалга ошириш учун ҳам ишлатилиши мумкин бўлган VR (I-VII) платформасининг тақдимоти;

– таълим контентини яратишга қаратилган AR платформасининг тақдимоти.

Томонлар Корея томонининг инновацион таклифларини Ўзбекистон Республикаси мактабгача таълим тизими эҳтиёжларига мослаштириш соҳасидаги ҳамкорликни янада ривожлантириш зарурлиги тўғрисида келишиб олдилар.

Учрашув якунига кўра, томонлар Ўзбекистон Республикаси Мактабгача таълим вазирлиги ва Пучон университети ўртасида мактабгача таълим соҳасида фаол мулоқотни давом эттириш учун мунтазам икки томонлама учрашувлар ўтказиш амалиётини давом эттириш зарурлиги тўғрисида ўзаро якдил фикрга келдилар, деб хабар беради Мактабгача таълим вазирлиги матбуот хизмати.