Ушбу тадбирларда барча минтақаларни намоён этган 24 давлат - Бангладеш, Хитой, Ҳиндистон, Япония, Корея Республикаси, Малайзия, Индонезия, Шри Ланка, Фаластин, Саудия Арабистони, Россия, Украина, Молдова, Сербия, Словакия, Шотландия, Исландия, Бразилия, Куба, Парагвай, Никарагуа, Гватемала ва Танзания қатнашди.
Маданиятлар кўргазмасида дунё давлатлари ўзларининг она тилларини намоён қиладиган мумтоз қўшиқлар, миллий чолғу асбобларида ижро этилган мусиқалар ва анъанавий рақслари ҳамда саҳна кўринишлари билан иштирок этди.
Мамлакатимизнинг ЮНЕСКОдаги доимий ваколатхонаси ҳам мазкур тадбирларнинг халқлар маданияти, тиллари ва миллий ошхоналари кўргазмаларида иштирок этди.
Ўзбекистон унинг доирасида Алишер Навоий ва Заҳириддин Муҳаммад Бобур ҳаёти ва ижодига бағишланган тақдимот ўтказди. Жумладан, буюк бобокалонларимиз ҳақида батафсил маълумотлар тақдим этилгани баробарида «Навоий ва Гули» номли саҳна кўриниши намойиш этилди, Бобурнинг сара ғазалларидан намуналар ўқилди.
Тиллар кўргазмасида Ўзбекистон томони ўзбек тилида чоп этилган китобларнинг, жумладан, Пиримқул Қодировнинг «Юлдузли тунлар» китоби тақдимотини ўтказди. Иштирокчиларга давлатларнинг миллий гастрономик салоҳиятлари ҳам тақдим этилди.
Иштирокчи давлатлар томонидан Ўзбекистоннинг Халқаро она тили кунига бағишлаб ўтказилган тадбирлардаги иштироки юқори баҳоланди, деб хабар беради «Дунё АА.
