Ушбу тадбир бу йўналишдаги миллий дастурни янада ривожлантириш мақсадида бачадон бўйни саратонини скрининг қилиш бўйича пилот лойиҳага старт берди.

Тақдимот маросимида айтилишича, ушбу лойиҳа Япония ҳукуматининг молиявий кўмаги билан, БМТ Тараққиёт дастури ва ЮНФПAнинг «Орол бўйи минтақасидаги аҳолининг экологик, иқтисодий заифликларига, шунингдек, аҳоли саломатлиги масалаларига чидамлилигини кучайтириш» қўшма дастури доирасида Қорақалпоғистон Республикасида амалга оширилади. Шунингдек, лойиҳа Чирчиқ шаҳрида бачадон бўйни саратони скрининги бўйича Жаҳон соғлиқни сақлаш ташкилоти билан қўшма дастурнинг бир қисми сифатида ҳаётга татбиқ этилади.

ЖССТ маълумотларига кўра, жаҳонда ҳар йили 300 мингдан зиёд аёл бачадон бўйни саратонидан вафот этади. Дунёда бўлгани каби, Ўзбекистонда ҳам бачадон бўйни саратони барча ёшдаги аёллар ўртасида кўкрак бези саратонидан кейинги ўринда турадиган ва кенг тарқалган саратон хасталиги ҳисобланади.

Касалликлардан ўлим кўрсаткичи бўйича эса, бачадон бўйни саратони барча ёшдаги аёллар ўртасида кўкрак бези ва ошқозон саратонидан кейин учинчи ўринда ва туғиш ёшидаги аёллар (15 – 44 ёш) орасида эса бачадон саратонидан ўлим кўрсаткичи бўйича иккинчи ўринда туради.

Тадбирда Соғлиқни сақлаш вазирлигига берилган ускуналар бачадон бўйни саратони бўйича мамлакат миқёсида скринингни ташкил этиш бўйича ҳаракатларни янада жадаллаштиришда муҳим омил бўлиши таъкидланди.

Эслатиб ўтамиз, Ўзбекистонда 2019 йилдан бошлаб ОПВга қарши вакцина Миллий эмлаш календарига киритилган. Таҳлил натижаларига кўра, эмлаш эвазига келажакда ҳар йили 1 100 та касалланиш ва бачадон бўйни хасталиги бўйича

600 га яқин ўлим ҳолатининг камайишига эришилади. 2050-2060 йилларгача аҳолининг 90 фоизи эмлаш билан қамраб олиниши орқали Ўзбекистонда бачадон бўйни саратони касаллиги тўлиқ бартараф этилишига эришилади, деб хабар беради Соғлиқни сақлаш вазирлиги матбуот хизмати.