Бу ҳақда Ўзбекистон транспорт вазири Илҳом Маҳкамов маълум қилди.
20 март, пайшанба куни президент Шавкат Мирзиёевга жамоат транспортини ривожлантириш, жумладан, метрополитен тармоғини кенгайтириш лойиҳалари тақдим этилди.
Илҳом Маҳкамов аниқлик киритишича, лойиҳа «Салар» бекатидан Акушерлик ва гинекология институтига қадар электропоезд йўналиши бўйлаб («Шаҳриобод» бекати орқали «Экобозор»гача) 5,5 км узунликдаги ер усти метросини барпо этишни кўзда тутади.
Метро линияси автомобиль йўлини кесиб ўтадиган тўртта жойда туннель қуриш режалаштирилган.
«„Пушкин“ метро бекатидан „Салар“ темир йўл бекатигача траволатор орқали ёпиқ ўтиш йўли бўлади. Сўнгра ер усти метроси электропоезд йўналиши бўйлаб ҳаракатланиб, Акушерлик ва гинекология институти томонга бурилиш жойида аста-секин ер остига тушади. Бу биринчи ер усти метроси бўлади. Бугун биз президентдан лойиҳани батафсил ишлаб чиқишни бошлаш тўғрисида кўрсатма олдик. Халқаро маслаҳатчиларни жалб этамиз. Лойиҳалаш жараёни 1−1,5 ой давом этади», — деб маълум қилди вазир.
Кейинчалик ер усти линияси «Ашхобод» боғи орқали Кичик ҳалқа автомобиль йўли бўйлаб «Тошкент» метро бекатигача (Шимолий вокзал) қўшимча 4 км га узайтирилиши мумкин.
Транспорт вазирлиги раҳбари лойиҳа Тошкент шаҳрининг бош режасини инобатга олган ҳолда ишлаб чиқилганини таъкидлади. Йўналиш янги турар-жой бинолари ва мавзеларини қуриш билан реноватсия дастури режалаштирилган ҳудудлардан ўтади.
Умумий узунлиги 10,8 км бўлган янги метро линиясида кунига 85 минг йўловчи ташилиши кутилмоқда. Бир томонга бориш вақти 17 дақиқани, поездлар орасидаги интервал эса тахминан 6 дақиқани ташкил этади.
Ҳисоб-китобларга кўра, бугунги кунда Тошкентга Қибрай ва ТТЗ томонидан 194 мингга яқин киши кириб келади: 44 минг нафари автобус, микроавтобус ва Damas, 47 минг нафари енгил автомобилларда. Янги метро линияси кўчалардаги, шунингдек, «Буюк ипак йўли» метро бекатларидаги юкламани қисман камайтиради.
Транспорт вазирлиги ҳузуридаги Транспортни комплекс режалаштириш лойиҳа офиси раҳбари Мурод Обидовнинг маълум қилишича, Салар-ТТЗ метро линияси учун йўналиш траекториясининг турли вариантлари кўриб чиқилган.
Давлат раҳбарига тақдим этилган концепция «Салар» темир йўл станциясидан Акушерлик ва гинекология илмий-тадқиқот институтигача ер усти-ер ости линиясини қуришни назарда тутади, дея тасдиқлади у.
«Метрополитен темир йўл бўйлаб ўтади. Кейин линияни ер остига ўтказиш кўзда тутилади. У ТТЗ охирги автобус бекатигача чўзилиб, у ерда транспорт алмашинув тугунини (ТАТ) ҳосил қилади. Энг сўнгги бекатда темир йўл траекториясининг эгрилиги туфайли темир йўл станциясини қуришнинг имкони бўлмагани сабабли, ТАТ электропоезд учун стансиянияни жойлаштириш мумкин бўлган участкада қурилиши кўзда тутилган», — дея тушунтирди у.
Мурод Обидов таъкидлашича, темир йўл бир қатор мураккаб кесишмалардан ўтганлиги сабабли, концепция техник жиҳатдан янада чуқурроқ ишлаб чиқилишни талаб этади. Унинг айтишича, бугунги кунда бу ерда бештадан ортиқ бўлмаган темир йўл поездлари ҳаракатланмоқда, метрополитен поездларининг ҳаракатланиш оралиғи эса уч дақиқагача етиши мумкин. Поездлар ҳаракати частотаси линия қурилишига шундай ёндашувни тақозо этадики, метро автотранспорт ҳаракатига халақит бермаслиги лозим.
Янги метро линиясида кунлик йўловчилар оқими 80 мингга яқин кишини ташкил этиши кутилмоқда. Ҳозирда Тошкентга Қибрай ва ТТЗ томонидан 200 мингдан ортиқ киши кириб келмоқда. Янги метро линияси йўллардаги юкламани қисман камайтиради, шунингдек, «Буюк ипак йўли» метро бекати, айниқса кечки соатларда, атрофида Чирчиқ, Ғазалкент ва бошқа йўналишларга транспорт кутаётган кўплаб йўловчилар тўпланишини ҳам бартараф этади. Янги ТАТ пойтахтнинг жамоат транспорти йўналишлар тармоғи билан боғланадиган агломерация йўловчилари учун қулай тугун вазифасини ўтайди.
