Олтинсой тумани «Яккатут» маҳалласида жойлашган «Ўткир Тош Жилоси» фермер хўжалиги ер майдони кўздан кечирилди.

Ўрганиш жараёнида, ушбу фермер хўжалиги раҳбари Ў. Т фуқаро А.М воситачилигида фермер хўжалиги ер майдонида ўсиб турган кўп йиллик 8 туп элдор қарағайи дарахтларини туманнинг «Миршоди» маҳалласида яшовчи фуқаро А.С.га 5 миллион сўмга баҳолаб сотгани аниқланди.

Фуқароларнинг ўзаро келишувига асосан А.С ўсувчанлигини йўқотмаган кўп йиллик ноёб дарахт турларига кирувчи 8 туп элдор қарағай дарахтларини таг қисми билан кесиб олганлиги ойдинлашди.

Фуқаролар бу ҳаракати билан «Ўсимлик дунёсини муҳофаза қилиш ва ундан фойдаланиш тўғрисида»ги қонуннинг 37-моддасининг талабини бузган.

Тўпланган ҳужжатлар асосида ҳисоб-китоб қилинганда, табиатга жами 551 100 000 (беш юз эллик бир миллион юз минг) сўм зарар етказилган.

Аниқланган ҳолат юзасидан бирламчи ҳужжатлар расмийлаштирилиб, ҳуқуқни муҳофаза қилиш органларига тақдим этилди.