Boshqa tomondan esa maymun chechagi virusi shiddat bilan tarqalyapti. May oyidan buyon 48 ta shtatda 7 ming nafardan ortiq bemor roʻyxatga olindi. Shu bois AQSH hukumati ushbu epidemiyani favqulodda holat, deb eʼlon qildi.
Hozir eng katta bosim ixtisoslashgan klinikalarga tushyapti. Bemorlar soni kundan kun ortyapti. Vaksinalar va maxsus testlar tanqisligi koʻzga tashlanyapti.
Toʻgʻri, mamlakatda shu kungacha kasallik oqibatida oʻlim holatlari kuzatilgani yoʻq. Ammo baʼzi bemorlarda infeksiya ogʻir oʻtyapti. Badandagi toshmalar kuchli ogʻriqlarni keltirib chiqarayotgani tufayli statsionar muolajalarga talab oshib boryapti.
— Xastalikni antibiotiklar qabul qilish bilangina tezda bartaraf etib boʻlmaydi, — deydi Chikagodagi “Howard Brown Health” klinikasi shifokori Anu Hazra. — Shu bois davolash jarayoni uzoq vaqt talab etadi. Oqibatda bemorlar bir necha hafta davomida ogʻriqlar bilan kurashishga majbur boʻlyapti.
Mutaxassisning qayd etishicha, may oyidan beri Chikagoda kasallik alomatlari bilan murojaat qiluvchilar soni geometrik progressiya qonuniyati asosida koʻpaymoqda.
Oʻz navbatida, infeksiya tabiati birmuncha oʻzgargan. U endi nafaqat jismoniy muloqot, balki sochiq va choyshab kabi shaxsiy gigiyena vositalari orqali ham yuqishi mumkin.
Ayni sababdan mamlakatda kasallikka qarshi emlash kompaniyasi davom ettirilyapti. Qolaversa, Buyuk Britaniya va Ispaniyada vaksinatsiya jarayonlariga katta eʼtibor qaratilyapti.
Maymun chechagiga chalinganlar soni 550 nafarga yaqinlashishi oqibatida Italiya hukumati ham infeksiya tarqalishini emlash orqali jilovlashga qaror qilgan. Bu yerda dastlab 200 kishi vaksinani qabul qiladi. Yana 600 doza preparat qoʻllash uchun tayyor, deb xabar beradi Sogʻliqni saqlash vazirligi matbuot xizmati.
