Бугун Рейн-Рур шаҳри (Германия)да бўлиб ўтган Бутунжаҳон ёзги «Универсиада» ўйинларида муносиб иштирок этган Ўзбекистон жамоаси юртимизга қайтиб келишди.
Спортчиларимизни Тошкент халқаро аэропортида Ўзбекистон Республикаси Президентининг спорт бўйича вакили Одил Абдурахманов, Спорт вазирлиги, Олий таълим, фан ва инновациялар вазирлиги ҳамда Миллий Олимпия қўмитаси раҳбарияти, кенг жамоатчилик ҳамда ОАВ вакиллари иштирокида тантанали тарзда кутиб олди.
Маросимда сўзга чиққан спортчиларимиз эришган натижалар мамлакатимиз мустақиллигининг ўттиз тўрт йиллик байрамига муносиб совға бўлганлиги, юртимизда Давлатимиз раҳбари томонидан спортни ривожлантиришга қаратилган эътибор ўз натижасини бераётганлигини фахр ва ифтихор билан тилга олишди.
Маълумот учун, жорий йилнинг 16-27 июль кунлари Рейн-Рур шаҳри (Германия)да Бутунжаҳон ёзги «Универсиада» ўйинлари ўтказилди.
Мазкур Бутунжаҳон ёзги «Универсиада» ўйинларида дунёнинг 113 та давлатдан 18 та спорт тури бўйича 5 100 нафардан ортиқ талаба спортчилар 234 та жамланма медаллар учун баҳс олиб борди. Ўзбекистон спорт делегацияси мазкур мусобақада 11 та спорт тури (камондан отиш, спорт гимнастикаси, енгил атлетика, сувга сакраш, дзюдо, бадиий гимнастика, эшкак эшиш, сузиш, стол теннис, таэквондо ВТ ва теннис) бўйича 18 та олий таълим муассасаларида таҳсил олувчи 53 нафар спортчилардан иборат таркиб билан иштирок этди.
Ўзбекистон спорт делегацияси мусобақа якунларига кўра, Ўзбекистон Универсиадалар тарихидаги энг яхши натижасини қайд этди , 5 та спорт тури бўйича (сузиш, бадиий гимнастика, енгил атлетика, таэквондо ВТ, дзюдо) 4 та олтин, 4 та кумуш ва 7 та бронза, жами 15 та медаль қўлга киритди.
Ушбу натижа билан Ўзбекистон спорт делегацияси умумжамоа ҳисобида 13-ўринни, Марказий Осиё давлатлари орасида 1-ўринни эгаллалади (Япония 1-ўрин, Хитой 2-ўрин, АҚШ 3-ўрин, Корея 4- ўрин, Италия 5-ўрин, Озарбайжон 24-ўрин, Қозоғистон 37-ўрин, Қирғизистон 38-ўрин).
Шунингдек, Универсиадалар тарихида илк бор сузиш, бадиий гимнастика ва енгил атлетика спорт турларидан медаллар қўлга киритилди.
