Қашқадарё вилояти ИИБ матбуот хизмати ҳолат Чироқчи туманида юз берганини маълум қилди.
Унда айтилишича, шу йилнинг 24 июль куни соат 22:30 ларда Чироқчи туманида яшовчи Д.И. 102 рақамига қўнғироқ қилиб, бирга расмий никоҳсиз яшаб келаётган эркак Н.П.нинг онаси уйига келиб жанжал чиқараётгани ҳақида хабар берди.
Ҳодиса жойига етиб келган профилактика инспектори, лейтенант М.Холмаматов жанжални бартараф этиш мақсадида Н.П.ни туман ИИБ биносига олиб келган.
Шу пайтда Н.П.нинг расмий никоҳида бўлган аёли қариндошлари билан бирга жамоат жойида “Сенга эрим керакми” деб, Д.И.ни бир неча маротаба танасининг турли жойларига тепиб, уриб кийимсиз ҳолатда қолдирди.
Мазкур воқеанинг видеотасвири ижтимоий тармоқларда тарқалиб, жамоатчиликда катта эътироз уйғотди.
Ҳолат бўйича профилактика инспектори томонидан терговга қадар текширув ҳаракатлари олиб борилган ва жабрланувчининг тан жароҳатлари оғирлик даражасини аниқлаш учун суд-тиббий экспертиза тайинланган.
Чироқчи туман ИИБ ҳузуридаги Тергов бўлинмаси мазкур ҳолат юзасидан Жиноят кодексининг 277-моддаси 1-қисми (“Безорилик”) билан жиноят ишини қўзғатиб, тергов ҳаракатларини олиб бормоқда.
