Илаж Франция Республикасы Ҳүкимети тәрепинен шөлкемлестирилди ҳәм 2024-жыл март айында Брюсселде болып өткен биринши саммиттиң табыслы тәжирийбесин даўам еттирди.
Өзбекстан Республикасы делегациясына "Узатом" агентлиги директоры Азим Ахмедхаджаев басшылық етти. Саммит жумысында мәмлекет ҳәм ҳүкимет басшылары, халықаралық шөлкемлердиң басшылары, қаржы институтлары ҳәм ядро санаатының ўәкиллери, жетекши экспертлер қатнасты.
Тийкарғы итибар декарбонизация мақсетлерине ерисиўде, глобал энергетика қәўип-қәтерлерин шешиўде ҳәм энергетикалық қәўипсизликти беккемлеўде атом энергетикасы әҳмийетли орын ийелейтуғынына қаратылды. Бүгинги күнде дүньяда электр энергиясын ислеп шығарыўдың дерлик 10 проценти атом энергетикасы үлесине туўра келеди ҳәм көплеген мәмлекетлер оған қайта тиклениўши энергия дәреклерине исенимли қосымша сыпатында қарамақта.
АЭХА Бас директоры Рафаэль Гросси саммит жумысында белсене қатнасып, жоқары маманлықтағы техникалық жәрдемди тәмийинледи, панель сессиялары ҳәм дөгерек сәўбетлеринде мазмунлы додалаўларды қәлиплестирди. Ядро технологиялары, радиация қәўипсизлиги, қаржыландырыў механизмлери ҳәм халықаралық бирге ислесиў тараўларындағы жетискенликлер көрип шығылды.
Франция Президенти Эммануэль Макрон Фукусима сабақларынан кейин атом энергетикасы қәўипсизлиги сезилерли дәрежеде артқанын атап өтип, киши модулли реакторларды раўажландырыў перспективаларын атап өтти. Жеткерип бериў шынжырларын раўажландырыў ҳәм уранды байытыў бойынша уран ислеп шығарыўшы мәмлекетлер, соның ишинде, Өзбекстан менен бирге ислесиўге айрықша итибар қаратты.
Европа Комиссиясының баслығы Урсула фон дер Ляэн Европада АСММды жедел енгизиў бойынша жаңа стратегияны таныстырып, өтмиште пуқаралық ядро энергиясынан ўаз кешиў стратегиялық қәтелик болғанын атап өтти.
Өзбекстанның қатнасыўы мәмлекетимиздиң ядролық ҳәм радиациялық қәўипсизлик бойынша жоқары стандартларға садықлығын, тынышлық атомын жуўапкершиликли раўажландырыў, энергетикалық өтиў ҳәм Климат бойынша Париж келисимин әмелге асырыў бойынша глобаллық сөйлесиўге белсене үлес қосыў бағдарындағы умтылысларын тастыйықлады.
"Узатом" агентлиги директоры Азим Ахмедхаджаев:
"Ядро энергетикасы бойынша екинши халықаралық саммитте қатнасыў - тәжирийбе алмасыў ҳәм Өзбекстанның жетискенликлерин көрсетиў ушын әҳмийетли имканият. Тек ғана қәўипсизлик ҳәм исеним тийкарында халықаралық бирге ислесиў арқалы атом энергетикасының турақлы раўажланыўын тәмийинлеў мүмкин.
Саммит шеңберинде Өзбекстан ўәкиллери "Ядролық жанылғы жеткерип бериўдиң глобал қәўипсизлигин тәмийинлеў" темасындағы дөгерек сәўбетинде қатнасып, ядролық инфраструктураның исенимлилиги ҳәм турақлылығы бойынша стратегиялық мәселелерди додалады.
"Узатом" агентлиги миллий ядро энергетикасын раўажландырыў стратегиясын қәўипсизликтиң халықаралық стандартларына қатаң сәйкес ҳалда, мәмлекет ҳәм регионның турақлы келешеги жолында әмелге асырыўды даўам еттиреди.
