Ўтган йил декабрдан буён бу ерда қатъий карантин чекловлари бекор қилингач, СOVID-19 шиддат билан тарқала бошлади. Хитой Миллий соғлиқни сақлаш комиссияси вакили Цзяо Яхуйнинг Пекинда бўлиб ўтган матбуот анжуманида маълум қилишича, 2022 йил 8 декабрдан жорий йил 12 январгача мамлакатда коронавирус билан боғлиқ қарийб 60 мингта ўлим ҳолати қайд этилди.

Аввалроқ Хитой ҳукумати мазкур хасталикдан ўлим кўрсаткичлари статистикасига фақат вирусли пневмониядан келиб чиққан нафас етишмовчилиги қурбонларини киритаётган эди. Юқорида келтирилган рақам эса бир пайтнинг ўзида ёндош касалликлардан ҳам азият чеккан ва СOVID-19 асоратлари туфайли вафот этган беморларни ҳам қамраб олади.

Куни кеча Жаҳон соғлиқни сақлаш вазири Тедрос Гебрейесус Хитой соғлиқни сақлаш вазири билан мулоқотда реал эпидемиологик ҳолатни муҳокама қилди ва айни пайтда шифохонада даволанаётган, жумладан, шошилинч тиббий ёрдам ва интенсив терапияга муҳтож беморлар сони тўғрисида маълумот олди. "Айни пайтда мазкур кўрсаткичлар ЖССТ томонидан таҳлил қилинмоқда. Унинг натижалари Хитойдаги эпидемиологик вазият ҳамда коронавирус янги тўлқини таъсирини яхшироқ тушуниш имконини беради”, — дейилади ташкилот баёнотида.

Эслатиб ўтамиз, ҳозирги пайтда дунёда “омикрон” штаммининг юқувчанлик даражаси юқори бўлган “кракен” номли ХBB.1.5 субварианти кенг тарқаляпти. Шу боис мутахассислар, аҳолига хасталикка қарши бустер дозада эмланишни тавсия қилмоқда.