Терма жамоанинг яна футболчиси Остон Ўрунов ҳам мазкур учрашувни ўтказиб юборадиган бўлди. Бу ҳақда ЎФА матбуот хизмати хабар берди.
"Ўзбекистон миллий терма жамоаси футболчиси Остон Ўрунов Бирлашган Араб Амирликлари терма жамоаси билан учрашувда жароҳат сабабли иштирок эта олмайди. Футболчимиз тез фурсатда соғайиб, сафга қайтишини тилаб қоламиз", - деб ёзади хабарда.
Ўрунов 5 октябрь куни "Персеполис" сафида "Чадормалу"га қарши ўйиндан олдинги чигилёзди машғулотда жароҳат олган ва асосий таркибдан захирага олинган эди.
Футболчи 10 октябрь куни Ўзбекистон терма жамоаси сафида Эронга қарши баҳснинг 71-дақиқасида Аббос Файзуллаевнинг ўрнига захирадан майдонга тушганди. У Эрон билан ўйиндан кейинги машғулотларнинг ҳеч бирида иштирок этмади.
