Булоқбоши тумани «Сарвонтепа» МФЙ ҳудудидан оқиб ўтувчи Жанубий Фарғона канали қирғоқларининг бирига шикаст етганлиги натижасида маълум миқдорда сув сизиб чиққан.

ФВВ матбуот хизматининг хабар беришича, ҳодиса оқибатида ушбу маҳаллада жойлашган 100 га яқин хонадонга сув кирган. Шундан тахминан 30 тасида хонадоннинг ичига, қолган 70 та ҳолатда эса томорқасига сув кирган.

Сув хўжалиги вазирлигига кўра, 2025 йил 8 май куни соат 8:00 ларда Андижон вилоятидан оқиб ўтувчи Жанубий Фарғона магистрал каналининг ПК-194+60 пикетида кичик ГЭС қуриш ишларини олиб бориш жараёнида каналнинг дамбасини сув ювиб кетган.

Мазкур объект Андижон, Фарғона вилоятлари ва қўшни Қирғиз Республикаси ҳудудларидаги ижтимоий объектлар ва қишлоқ хўжалиги экин майдонларини сув билан таъминлашга хизмат қилади.

Электр энергияси ишлаб чиқаришни йўлга қўйиш учун каналнинг ПК-194+60 пикетида “Гидропроект” МЧЖ лойиҳаси асосида “Гидроқурилиш буюртмачи хизмати” МЧЖ буюртмаси билан ГЭС қуриш ишлари олиб борилмоқда.

Ишчи гуруҳининг аниқлашича, ПК-194+60 пикетда каналнинг лойиҳавий сув ўтказиш қобилияти 80 м3/сек. бўлиб, ҳолат юзага келган вақтда каналдан 60 м3/сек сув ўтиб турган.

Фавқулодда вазиятни бартараф этиш учун Андижон сув омборидан сув чиқиши тўхтатилди. Ҳозирда каналда 30 м3/сек сув қолган бўлиб, соат 14:00 гача тўлиқ тўхтатилади.

Каналдаги ўтган сув Қуйи Жанубий Фарғона каналига йўналтирилмоқда. Ҳозирда аҳоли хонадонларига сув оқишини камайтириш чоралари кўрилмоқда.

Каналнинг дамбасини тиклаш бўйича штаб ташкил этилиб, раҳбар ходимлардан иборат доимий навбатчилик йўлга қўйилди. Фавқулодда вазиятни бартараф этиш учун 10 та самосвал, 4 та кара, 2 та бульдозер, 8 та экскаватор ва 50 дан ортиқ ишчи-ходимлар жалб қилинди.

Ҳозирда Фавқулодда вазиятлар вазирлиги ва бошқа ҳамкор ташкилотларнинг техникалари ёрдамида сув оқимини пасайтириш ва кирган сувларни чиқариб ташлаш ишлари олиб борилмоқда. Вазият тўлиқ назоратга олинган, ҳолат юзасидан қўшимча маълумот тақдим этилади.