Бухоро аёллари либосларининг ташқи кўриниши бошқа ҳудудларга қараганда кўпроқ шариат меъёрлари билан белгиланган. Унга кўра, либос тана тузилишини яққол намоён этиши керак эмас эди. Аёллар-баранг шойидан кенг либослари, турфа рангли рўмоллари, заргарлик буюмлари билан ёрқин таассурот қолдирган. Аслзода аёллар ва амирнинг хотинлари либоси зардўзи кашта билан бежирим безатилар эди.
Бухоролик аёллар ёрқин рангли матолардан фойдаланиш, қимматбаҳо буюмлар билан зеб беришни, қошини бўяш ва кўзига сурма тортишни, юзни оқартириш ва қизартиришни хуш кўрган. А. Борнс Бухорода аёллар тишларини қора бўёқ билан бўяши, сочини ўриб, кокилларини елкага ташлаб юришини қайд этган.
