Жанубий Европа иссиқ мавсумнинг бошланишига ва унинг қишлоқ хўжалигига зарар етказувчи қурғоқчиликнинг кучайишига тайёргарлик кўрмоқда. Энг кўп зарар кўрган Европа Иттифоқига аъзо давлатлар ўзларига молиявий кўмак беришларини, хусусан, ўта оғир вазиятларда фермерларга ёрдам беришга мўлжалланган “Аграр захиралар”дан 450 миллион евро миқдоридаги маблағ ажратишларини сўрашмоқда.
“Испания мисолида йил бошидан буён ёғингарчилик 30 фоиздан кўпроққа камайганини кўряпмиз. Бу ҳайвонларнинг яйловларда озиқланишига бевосита таъсир кўрсатади. Бу қишки экинларга ҳам таъсир қилади. Бу баҳорги экинлар учун ҳам салбий оқибатларга олиб келади, яъни баъзи ҳолларда уларни экиш мумкин эмас. Шунингдек, сув босими пасайиши туфайли бу суғориш ишларига ҳам салбий таъсир этади”, деди Испания қишлоқ хўжалиги, балиқчилик ва озиқ-овқат вазири Луис Планас Пучадес.
Ёғинғарчиликнинг камайишидан энг кўп Испания ва Португалия зарар кўради. Болтиқбўйи ва Скандинавия мамлакатларида тупроқ намлиги одатдагидан паст бўлди.
Испанияда 2022 йил 1 октабрдан 2023 йил 25 апрелгача ўртача ёғингарчилик танқислиги ўртача кўрсаткичдан 24 фоизга паст бўлди, Франциянинг 101 департаментидан 26 тасида ёз охиригача қурғоқчиликнинг юзага келиш хавфи мавжуд. Қурғоқчилик Португалиянинг материкдаги қисмининг 40 фоиздан ортиқ ҳудудида қишлоқ хўжалиги фаолиятига салбий таъсир кўрсатди.
Италияда эса нафақат қурғоқчилик, балки сув тошқинлари чорвачилик, узумзорлар, экинлар, мева-сабзавотга ҳам зарар етказади. Ҳисоботда айтилишича, По дарёси дельтасида сув оқимининг камайиши денгиздан туз кўтарилишига олиб келади ва бу сувни қишлоқ хўжалигида фойдаланиш учун яроқсиз ҳолга келтиради, деб хабар бермоқда ru.euronews.com.
