Вазирлар Маҳкамасининг 2020 йил 19 майдаги “Ўзбекистон Республикаси минерал хомашё базасини ривожлантириш ва қайта тиклаш давлат дастурларини шакллантириш тартиби тўғрисидаги низомни тасдиқлаш ҳақида”ги 297-сонли қарорига мувофиқ 2024 йил учун “Уран минерал хомашё базасини ривожлантириш ва қайта тўлдириш давлат дастури” тасдиқланган.
Геология-қидирув ишлари орқали Букантоғ ва Томдитоғ тоғларининг ён бағирларидаги уранга истиқболли ҳудудларини ўрганиш, шунингдек, башорат-тематик лойиҳалар доирасида олиб бориладиган ишлар янги истиқболли майдонларни аниқлашга қаратилган.
Корхона тасарруфидаги “Уран ва ноёб металлар геологияси” илмий-ишлаб чиқариш маркази ва унинг “Нурота” (Зафаробод, Конимех, Томди), “Букантау” (Учқудуқ, Томди, Зарафшон), “Зирабулоқ” (Нуробод, Зиёвуддин) геология-қидирув экспедицияси ва Геология-қидирув партия (Зафаробод, Конимех, Томди) ларига ушбу вазифа юклатилган.
Ҳозирда ушбу экспедиция геолог ва мутахассислари томонидан ҳудудларда геология-қидирув ишлари учун бурғилаш олиб борилмоқда.
Хусусан, жорий йилда “Букантау” ГҚЭ томонидан Учқудуқ туманида жойлашган Учқудуқ, Зиёкон, Мингбой, Майлисай, Томди туманида жойлашган Қизилқоқ, Ауминза, Тошқўра, Муллали, Нурафшон, Жасага ва Оқберди дала майдонларида бурғилаш ишлари амалга оширилмоқда.
Бунинг самарасида ГҚЭда башорат ресурслари ва уран захираларини ўстириш режалаштирилган. Шунингдек, жорий йилда 3 та янги майдонларда геология-қидирув ишлари олиб бориш кўзда тутилган.
Айни пайтда экспедицияда 10 та бурғилаш қурилмалари мавжуд. Улар ёрдамида ўтган 2023 йилда 203 минг погона метр бурғилаш ишлари бажарилган бўлса, бу кўрсаткични жорий йил якунигача 270 минг погона метрга етказиш режалаштирилган. “Букантау“ ГҚЭда меҳнат фаолиятини олиб бораётган 300 нафарга яқин муҳандис-техник ходимлар, геолог ва бурғиловчилар ушбу вазифани ўз муддатида амалга ошириш учун сидқидилдан меҳнат қилишмоқда.
“Навоийуран“ ДК ахборот хизмати
Реклама
