Самарқанд шаҳрида мамлакатимизга расмий ташриф билан келган Германия Федерал Канцлери Олаф Шольцни расмий кутиб олиш маросими бўлди.
Конгресс маркази олдидаги майдонда фахрий қоровул саф тортди. Ўзбекистон Республикаси Президенти Шавкат Мирзиёев олий мартабали меҳмонни шоҳсупага таклиф этди.
Ҳарбий оркестр икки мамлакат мадҳияларини ижро этди. Етакчилар фахрий қоровул сафи олдидан ўтиб, расмий делегациялар аъзоларини қутладилар.
Биргаликда суратга тушилгандан сўнг олий даражадаги музокаралар бошланди.
Германия Федератив Республикаси Федерал Канцлери Олаф Шольцнинг мамлакатимизга ташрифи доирасида Ўзбекистон Республикаси Президенти ҳузуридаги Давлат бошқаруви академиясида икки давлат қўшма таълим дастури – Бошқарув кадрларини тайёрлаш мактаби очилди.
