Сўнгги вақтларда озиқ-овқат хавфсизлигини таъминлаш глобал миқёсдаги энг долзарб масалалардан бири бўлиб қолмоқда. Олимларнинг фикрига кўра, иқлим ўзгаришлари, хусусан ёғингарчилик миқдорининг камайиши дунёнинг айрим минтақаларида гўшт ва гўшт маҳсулотлари нархининг ошишига сезиларли таъсир кўрсатади.

Қурғоқчиликнинг мол гўшти нархига таъсири икки омилга боғлиқ. Биринчиси, қурғоқчилик туфайли қорамолларни яйловларда боқиш имкониятининг камайиши бўлса, иккинчиси, мол гўшти ишлаб чиқариш учун талаб қилинадиган асосий озуқа экинларини етиштириш ҳажмининг кескин қисқаришидир.

Институт экспертлари ўтказган таҳлил Ўзбекистонда гўшт нархининг ўсиши мавсумий характерга эга эканлигини кўрсатди. Июль, август, сентябрь ва октябрь ойларида энг юқори ўсиш суръатлари қайд этилади. Масалан, 2019 йилнинг ана шу ойларида мол гўшти нархи 3,6 фоиз, 7,6 фоиз, 5,8 фоиз ва 2,1 фоиз, 2020 йилда эса 0,6 фоиз, 1,5 фоиз, 3,3 фоиз ва 5,9 фоизга ошган.

Юртимизда февраль, март ва апрель ойларидаги ўртача ёғингарчилик миқдори 2019 йилда 118 мм.ни ташкил этган бўлса, 2020 йилда 92,4 мм.гача камайган. 2018-2020 йилларни қамраб олган тадқиқот натижалари мамлакатимизда 22 фоиз ҳолатда мол гўшти нархининг ўзгариши ёғингарчиликнинг ўзгариши билан бир пайтга тўғри келишини кўрсатди.

Вилоятлар орасида Тошкент, Наманган, Сурхондарё ва Жиззах энг кўп ёғингарчилик кузатиладиган ҳудудлар саналса, Қорақалпоғистон Республикаси, Хоразм, Навоий ва Бухоро вилоятлари мазкур рўйхатда охирги ўринлардан жой олган.

Сўнгги йилларда Ўзбекистонда ёғингарчиликнинг энг кўп миқдори 2003 йилда қайд этилган.