Мутафаккирнинг 450 дан ортиқ илмий асарлар яратганлиги маълум. Бироқ бизгача 242 та асари етиб келган. Шулардан 43 таси тиббиётга, 4 таси адабиётга, 5 таси мусиқага, ўндан ортиғи астрономияга оиддир.
Ибн Синонинг Аристотель таълимоти хусусида Беруний ва ўзининг шогирди Бахманёр билан ёзишмалари тарихда машҳур.
Хоразмшоҳ вазири Абулҳусайн ас-Саҳлий илмларни севувчи киши бўлганидан, Ибн Сино у билан дўстлашган ва унга атаб «Рисола ал-иксир» асарини ёзган.
Журжонда эса Абу Убайд Жузжоний билан дўстлашади. У Ибн Сино билан олимнинг сўнгги дамигача, 25 йил давомида бирга бўлади.
Ибн Синонинг хориж ва юртимиздаги қўлёзма асарлари ҳақида “Ўзбекистон маданий мероси жаҳон тўпламларида” лойиҳаси доирасида чоп этилган китоблардан билиб олишингиз мумкин.
