ЖССТ бош директори Тедрос Аданом Гебреиесус БМТ соғлиқни сақлаш агентлиги маслаҳат гуруҳининг бу борадаги тўхтамини “тарихий лаҳза” деб атади.

RTS, S ва “Москирикс” деб номланувчи безгакка қарши вакцина 1987 йилда Британиянинг GlaxoSmithKline (GSK) фармацевтика компанияси томонидан ишлаб чиқилган.

“Бу африкалик олимлар томонидан тадқиқ қилинган вакцина ва биз бундан ғурурланамиз. Безгакнинг мавжуд профилактикасини яна ҳам кенгайтириш ва ушбу эмлашдан фойдаланиш ҳар йили ўн минглаб ёшларнинг ҳаётини сақлаб қолиши мумкин”, — деди ЖССТ бош директори.

2019 йилдан буён ЖССТ Гана, Кения ва Малавида 800 мингдан ортиқ болада препаратнинг самарадорлигини синовдан ўтказди.

Тахминан тўрт йил давом этган клиник тадқиқотларга кўра, препарат безгак инфекциясининг 39 фоизи, болалар орасида оғир ҳолатларнинг 29 фоизининг олдини олди. Шу билан бирга, ёзда Лондон тропик тиббиёт мактаби олимлари RTS,S га қарши эмланган ва айни пайтда безгакка қарши дориларни қабул қилган болалар орасида касалхонага ётқизиш ёки ўлим ҳолати 70 фоизга камайганини аниқлади.

“Бу олдинга катта қадам”, деди Кембриж тиббий тадқиқотлар институти директори Жулиан Рейнер.

Эмлашни синовдан ўтказган ЖССТ гуруҳини бошқарган доктор Aлекандро Кравиотонинг айтишича, вакцинани ишлаб чиқиш жуда қийин бўлган.

“Биз ҳали жуда самарали вакцинага эриша олмадик, лекин ҳозир бизда мавжуд бўлган бу эмлаш хавфсизлиги билан аҳамиятлидир”, деди Кравиото.

Безгак — чивин чақиши орқали одамларга юқадиган юқумли касаллик. Касаллик иситма, титроқ, талоқ ва жигар кенгайиши, камқонлик билан кечади. Ҳар йили тахминан 350-500 миллион киши бу касаликка чалинади. Улардан 1,3 дан 3 миллион нафаргача бемор вафот этади. Aсосан, бу касаллик Aфрикада кенг тарқалган.