Айни кунларда Канаданинг Торонто шаҳрида дунё миқёсидаги энг нуфузли тадбирлардан бири — Халқаро тоғ-кон саноати конференцияси бўлиб ўтмоқда.

Унда дунёнинг 135 дан ортиқ мамлакатларидан 27 мингдан ортиқ минерал ресурслар соҳасидаги етакчи мутахассислар, инвесторлар ва йирик компаниялар иштирок этди. Тадбирда Ўзбекистон технологик металлар комбинати ҳам қатнашди.

Анжуманнинг алоҳида эътиборга молик жиҳати унда “Ўзбекистон куни”нинг ўтказилиши бўлди.

Ушбу кун доирасида ўтказилган тақдимотларда Ўзбекистоннинг технологик металлар соҳасидаги улкан имкониятлари, хомашё ресурслари ва инвестициявий муҳити ҳақида тўлиқ маълумот берилди.

Фарҳод Абдуллаев, ЎзТМК бошқарув раиси:

— Ушбу анжуман жаҳоннинг энг йирик саноат ва инвестициявий тадбирларидан бири ҳисобланади. Биз бу ерда ўз маҳсулотларимиз, инвестициявий имкониятларимиз ва стратегик лойиҳаларимизни халқаро ҳамжамиятга тақдим этмоқдамиз. Халқаро компаниялар ва инвесторлар билан яқиндан мулоқот қилдик. Анжуман давомида қатор йирик хорижий компаниялар вакиллари билан саноатдаги янги технологиялар, минерал ресурсларни қазиб олиш ва қайта ишлаш, инвестиция лойиҳаларини амалга ошириш юзасидан фикр алмашилмоқда. Кўплаб компаниялар Ўзбекистон билан ҳамкорлик қилишга қизиқиш билдириб, ҳозирда музокаралар жараёнида қатор истиқболли келишувларга эришилмоқда.

Маълумот ўрнида: Ўзбекистон технологик металлар комбинати саноат учун муҳим аҳамиятга эга 20 та критик минерал бўйича 50 дан ортиқ йирик лойиҳаларни амалга оширишни режалаштирган.