МДҲ миқёсида ташкил этилган халқаро конгрессда «Энг ёш илмий изланувчи» номинацияси ғолиби бўлдим ва Тошкент тиббиёт академияси томонидан таъсис этилган «Академик V.V. Воҳидов» номидаги стипендияси соҳиби бўлдим. Жорий йилнинг май ойида эса Италиянинг Флоренция шаҳрида бўлиб ўтган халқаро конгресс ҳамда ISGE ўқув курсида қатнашиш учун тўлиқ грант ғолиби бўлдим. Энг қувонарлиси, ушбу конгрессда Осиёдаги ягона грант ютган талаба бўлдим ва 50 дан ортиқ ривожланган давлатлардан келган профессорлар ўртасида ўз илмий ишларим билан қатнашдим.
Президентимиз томонидан илм-фан, тиббиёт, спорт ва яна турли хил йўналишлар бўйича олиб борилаётган ислоҳотлар ўз самарасини беряпти, десак муболаға бўлмайди. 28 июнь куни Юртбошимиз Шавкат Мирзиёев раислигида ёшлар сиёсатига бағишланган видеоселектор йиғилиши ҳамда ёшлар билан мулоқот бўлиб ўтди.
Йиғилишда сўнгги етти йил ёшларни қўллаб-қувватлаш, уларни истеъдод ва салоҳиятини рўёбга чиқариш мақсадида 100 дан зиёд қонун ва қарор қабул қилиниб, 200 дан ортиқ имтиёз берилганлиги ҳақида айтиб ўтилди. Биргина таълим кредитидан 151 минг ёшлар фойдаланганлиги, эҳтиёжманд оиладан бўлган яна 110 минг талабанинг контрактини тўлашга 332 миллиард сўм ажратилганлиги айтиб ўтилди. Натижада эса олий таълимда қамров 9 фоиздан 42 фоизга, олийгоҳлар сони эса 77 тадан 212 тага етганлиги ҳақида маълумот берилди. Шу билан бирга, ИТ соҳасида ўзини ўзи банд қилган ёшларга ИТ парк резиденти мақоми бериладиган бўлди.
Ёшлар куни муносабати билан жуда кўп ёшларимиз, иқтидорли талабаларимиз ҳамда турли хил соҳа вакиллари рағбатлантирилди. Шу қаторда бизнинг камтарона меҳнатларимиз юксак баҳоланиб, Юртбошимиз «Мард ўғлон» давлат мукофоти билан тақдирлади. Ушбу мукофот янада ўз устимизда ишлашга, тиббиёт соҳасини ривожлантиришга ундайди.
Президентимиз айтганларидек, кам ухлаб, кўп ҳаракат қилишимизга катта куч беради. Бундай мукофотларнинг барчаси ёшларга қаратилаётган эътибор. Биз ёшлар бундан-да катта катта ютуқларга эришишга ваъда берамиз ва Президентимиз бизга берган ишончни албатта оқлаймиз.
Азизбек Валижонов,
Сайхунобод тумани
