Обсерваторияга 10 дан ортиқ халқаро илмий марказлар билан тузилган ҳамкорлик шартномалари асосида кўплаб замонавий ускуналар, ёруғлик детекторлари олиб келиниб, телескопларга ўрнатилган ва улар ёрдамида замон талабига жавоб берувчи кузатувлар, тадқиқотлар ўтказилмоқда.
Жумладан, Инновацион ривожланиш вазирлиги жамғармаси орқали замонавий ёруғлик детекторлари жамланмаси сотиб олинди. Бу детектор-камераларни 3 та телескопга ўрнатиш орқали кузатув сифати ва илмий натижалар аниқлигини анча ошириш кутиляпти.
Бундан ташқари, денгиз сатҳидан 2500-3000 м баландда жойлашган Туркистон тоғ тизмаси ҳудуди — Суффа платосида ҳозирги вақтда ноёб илмий объект РТ-70 радиоастрономик комплекси жойлашган.
Халқаро келишувга асосан Суффа платоси ҳудудида радиошаффофликни кеча-кундуз мониторинг қилиш бўйича илмий-тадқиқот ишларини олиб бориш ва RТ-70 радиотелескопини барпо этиш борасидаги ишларни мувофиқлаштириш Ўзбекистон Республикаси Фанлар академияси RТ-70 радиоастрономик обсерваторияси томонидан амалга оширилади.
Қурилаётган мажмуанинг бош инструменти тўла бурилувчи диаметри 70 метрли антенна спектрнинг миллиметрли тўлқин узунлиги диапазонининг қисқа соҳасида ишловчи радиотелескопнинг адаптив тизимли янги авлоди ҳисобланади. RТ-70 радиотелескопи катта юзали антеннанинг нодир характеристикаларига эга инструмент сифатида узоқдаги аппаратлар космик базаси билан алоқани таъминлаш учун ҳам фойдаланилиши мумкин.
Илмий комплексдан фойдаланиш истиқболлари бизнинг мамлакат олимлари учун фойдали бўлиши шубҳасиз. Умуман олганда, Фанлар академияси Астрономия институти, энг яхши оптик астропункт (Майданак тоғи)га эга олимларимиз аллақачонлардан бери халқаро дастурларда қатнашиб келмоқда. Майданак обсерваториясида оптик диапазонда ва Суффа платосида радиодиапазонда синхрон кузатувлар космик объектлардаги жараёнлар динамикаси ва физикасини янада чуқурроқ ўрганиш имконини беради.
Суффа платосидаги радиоастрономик комплекс, профессор-ўқитувчилар таркиби учун, шунингдек, Тошкент давлат университети ва Самарқанд педагогика университети астрофизика ва астрономия кафедраси ҳамда Тошкент ахборот ва алоқа университети талабалари учун ҳам йирик илмий-педагогик марказ бўлиб қолади.
