ИҲТ бош котиби доимий вакилнинг ишонч ёрлиқларини қабул қилар экан, уни ушбу лавозимга киришиши билан табриклади ва масъулиятли миссиясини амалга оширишда муваффақиятлар тилади.

Учрашувда томонлар Ўзбекистон ва ИҲТ ўртасидаги ҳамкорликнинг ҳозирги ҳолати ва истиқболларини муҳокама қилдилар. Томонлар, шунингдек, таълим, ёшларни қўллаб-қувватлаш ва инновациялар каби муҳим йўналишларда ўзаро ҳамкорликни фаоллаштиришдан ўзаро манфаатдор эканликларини билдирдилар.

Бош котиб Ўзбекистоннинг ислом цивилизацияси, илм-фани ва маданияти ривожига қўшган салмоқли ҳиссасини таъкидлаб, мамлакатимиз тарихан ислом оламининг илмий кашфиётлар, фалсафий тафаккур ва маънавий мерос маркази бўлганини алоҳида таъкидлади, деб хабар беради «Дунё» АА.

Бугунги кунда Ўзбекистон ислом уммати бирлигини мустаҳкамлаш, барқарор ривожланиш, таълим ва маданий меросни асраб-авайлашга қаратилган ташаббусларни илгари суришда муҳим роль ўйнашда давом этаётгани, бу эса уни Ислом ҳамкорлик ташкилоти мақсадларини амалга оширишда асосий ҳамкорлардан бирига айлантираётгани урғуланди.

Эслатиб ўтамиз, Нодиржон Турғунов 2024 йил март ойида Ўзбекистоннинг Саудия Арабистонидаги элчиси сифатида Ар-Риёз шаҳрига ташриф буюрган эди.

Дипломат 2016 йилдан бери ТИВ тизимида. Ўтган йиллар давомида Ташқи ишлар вазирлигининг Консуллик-ҳуқуқий департаментида турли лавозимларда фаолият олиб борди. Хусусан, 2019-2021 йилларда Ўзбекистоннинг Оқтов шаҳрида (Қозоғистон), 2021-2024 йилларда эса Жидда шаҳрида (Саудия Арабистони) бош консул бўлиб ишлаган.

Нодиржон Турғунов 2018-2024 йилларда Ўзбекистоннинг Саудия Арабистонидаги элчиси ва бош қароргоҳи Жидда шаҳрида жойлашган Ислом ҳамкорлик ташкилотидаги доимий вакили лавозимларида ишлаган Улуғбек Мақсудов ўрнига тайинланган.