· Путин Алиевга учрашувни AZAL самолёти ҳалокати билан боғлиқ вазиятни муҳокама қилишдан бошлашни таклиф қилди.

· У озарбайжонлик ҳамкасбига Россия осмонида юз берган фожиа учун узр сўраганини эслатди.

· Путин AZAL самолёти ҳалокатида ҳалок бўлганларнинг оила аъзоларига самимий ҳамдардлик билдирди.

· Россия келишувга мувофиқ, ҳалокатни тергов қилиш билан тўлиқ ҳамкорликни таъминламоқда.

· AZAL самолётининг қулаши сабаблари, жумладан, осмонда Украина дронининг мавжудлиги билан боғлиқ.

· AZAL самолёти ҳалокатга учраган куни Россия чегарани кесиб ўтган Украина учувчисиз учоқларини кузатиб борган.

· Россия ҳаво ҳужумидан мудофаа тизими томонидан учирилган иккита ракета AZAL самолётига тўғридан-тўғри тегмаган, бир неча метр нарида портлаган.

· Бортга катта эҳтимол билан жанговар элементлар эмас, балки парчалар бориб урилган.

· AZAL самолёти экипажидан Махачқалъага қўнишни сўрашди, бироқ улар ўз аэропортига боришга қарор қилишди.

· Ҳодиса ҳар томонлама таҳлил қилингандан сўнг ҳалокат сабаблари маълум бўлди.

Музокаралар Тожикистон пойтахти Душанбе шаҳрида бўлиб ўтди.

Икки томонлама учрашув бир кун аввал эълон қилинган эди. Путин давлат ташрифи билан Тожикистонда бўлиб турибди.

Душанбедаги музокаралар етакчиларнинг узоқ вақтдан бери биринчи тўлақонли учрашуви бўлди. Путин ва Алиев сентябрь ойида Хитойда ШҲТ саммити доирасида учрашган, бироқ Президент матбуот котиби Дмитрий Песков айтганидек, айтарли ҳеч қандай мулоқот бўлмаган.

Президентлар ўртасидаги сўнгги учрашув ўтган йилнинг октябрь ойида бўлиб ўтган. Путин ва Алиев ўртасида 2025 йил мартидан буён илк телефон суҳбати Россия етакчисининг туғилган кунида, 7 октябрда бўлиб ўтган. Кремль матбуот котиби бу суҳбатни муҳим деб атади.

Песковнинг сўзларига кўра, Путин ва Алиев ўртасидаги бугунги музокаралар кун тартибида биринчи навбатда икки томонлама муносабатлар муҳокама қилинади.

Бундай учрашув ўтказилаётганининг ўзи икки давлат раҳбарларининг барча долзарб масалаларни муҳокама қилиш ниятидан далолат беради, деди Песков. Унинг қўшимча қилишича, у озарбайжонлик ҳамкасблари номидан гапира олмайди, лекин Россия томонида ижобий кайфият ҳукмрон.

Сентябрь бошида Путин Россия ва Озарбайжон муносабатларида муаммолар борлигини, бироқ алоқаларни ривожлантиришга қизиқиш ҳамма нарсани ўз ўрнига қўйишини таъкидлаган эди, деб хабар берди ria.ru.