4 декабрь соат 23:30 да, 23 ёшли Азиз яна икки нафар шериги билан жиноий тил бириктириб, жиноий шериги Нодиржоннинг бошқарувиги «Lacetti» русумли автомашинада Учтепа туман 23–мавзеси бўйлаб ҳаракатланиб кетаётган вақтларида йўл ёқасида такси тўхтатиб турган 31 ёшли Суюнхонни Яшнобод туман Қўйлиқ бозори томонга олиб бориб қўйишга келишган.
Автомашинага ўтирганидан кейин, Суюнхонни маст эканлигини билгач, унинг ухлаб қолганлигидан фойдаланиб, одамлар қатнови кам бўлган Сергели туман Тошкент Халқа Автомобиль йўли Пастдарғом маҳалласида жойлашган метро қурилиши олиб борилаётган ҳудуддаги қоронғу жойга олиб борган.
Кейин эса Суюнхонни автомашинадан туширган, ҳамда Нодиржон орқасидан келиб, уни ўнг чап юзига қўлининг мушти билан уриб, ерга йиқитиб, уриб дўппослаб, юзи билан ерга қараган ҳолатда ётқизиб, қўлини орқасига қайириб, шимининг орқа чўнтагидан 350 минг сўм пуллари, 800 000 сўмлик «Samsung J-5» русумли уяли телефон аппарати, қўлидаги баҳоси 3 миллион сўмлик эркаклар тилла узуги, эгнидаги 320 000 сўмлик курткасини ҳамда унинг чўнтагидаги 850 доллар миқдоридаги пулларини босқинчилик йўли билан қўлга киритиб, ҳодиса жойидан яширинганлар.
Суд-тиббий экспертиза хулосасига кўра, фуқаро Суюнхонга «енгил» тан жароҳати етказилганлиги аниқланган.
Терговга қадар текширув жараёнида, Нодиржондан «Samsung J-5» русумли уяли телефон аппарати ва Сохибжондан эса бир дона эркаклар курткаси тегишли тартибда ашёвий далил тариқасида расмийлаштириб олинган.
Мазкур ҳолат юзасидан Учтепа туман ИИО ФМБ ҳузуридаги Тергов бўлими томонидан Азиз ва унинг шериклари Сохибжон, ва Нодиржонларга нисбатан Ўзбекистон Республикаси Жиноят кодексининг 164-моддаси 2-қисми «б» банди (босқинчилик) билан жиноят иши қўзғатилган.
Дастлабки тергов жараёнида, Азиз, Сохибжон ва Нодиржонлар жиноят ишида айбланувчи тариқасида ишда иштирок этишга жалб қилиниб, уларга нисбатан «қамоққа олиш» тарзидаги эҳтиёт чораси қўлланилган.
Ҳозирда тергов ҳаракатлари давом этмоқда, деб хабар беради Ўзбекистон Республикаси Ички ишлар вазирлиги ҳузуридаги Тергов департаменти.
