Анжуман ишида хориж ва маҳаллий мутахассислардан иборат 50 нафардан ортиқ қатнашчи иштирок этди.

Конференциянинг илмий йўналишлари “Машинасозликда материалларга ишлов беришнинг замонавий технологиялари”, “Машинасозликда замонавий техника, технологиялар ва материаллар”, “Мехатроника, автоматика ва робототехника”, “Янги конструкцион материаллар олишнинг замонавий технологиялари”, “Қишлоқ хўжалиги машиналари ва транспорт техникалари конструкцияларини такомиллаштириш йўллари” ҳамда “Машинасозлик соҳаси учун бакалавр ва магистрлар тайёрлаш сифатини бошқариш” каби мавзуларда ташкил этилди.

Анжуман ишини институт ректори Шарифбой Эргашев кириш сўзи билан очиб берди.

Шундан сўнг ялпи йиғилишда Россиянинг Қозон федерал университети филиали — Набережние Челни институти вакили Дмитрий Панкратов, Россия давлат аграр университети профессори Парвиз Гаджиев, Тошкент давлат техника университети профессори Камолхон Каримов, Қишлоқ хўжалигини механизациялаш илмий-тадқиқот институти профессори Муҳаммаджон Тошболтаев ва бошқаларнинг марърузалари тингланди, дея хабар беради Наманган муҳандислик-қурилиш институти ахборот хизмати.