Таъкид гардид, ки чунин чорабиниҳо ба амиқтар шудани робитаҳои тиҷоратию иқтисодӣ ва боз кардани самтҳои нави ҳамкорӣ мусоидат мекунанд.
Тавре зикр гардид, дар савдои мутақобила субот мушоҳида мешавад. Бахусус, ҳаҷми муомилоти мол ба 500 миллион доллар расида, теъдоди корхонаҳои муштарак аз 210 адад гузашт.
Захираҳои мавҷуда амиқ таҳлил гардида, нуқтаҳои нави афзоиш муайян карда шуданд ва маҷмӯи умумии лоиҳа ва созишномаҳои тиҷоратӣ ба маблағи 1 миллиард доллар ташаккул ёфтанд.
Сарвазири Ӯзбекистон зимни суханронии худ таваҷҷуҳи ҳозиринро ба натиҷаҳои ислоҳоти васеъмиқёс, ки дар кишварамон таҳти роҳбарии Президент Шавкат Мирзиёев ҷиҳати беҳтар намудани фазои соҳибкорӣ ва фароҳам овардани шароити мусоид барои сармоягузорони хориҷӣ амалӣ мегарданд, ҷалб намуда, ба масъалаҳои зерин таваҷҷуҳи хоса зоҳир кард.
Аз ҷумла, дар давраи гузашта маҷмӯи маҳсулоти дохилӣ ду баробар афзуд. Чанде пеш Сандуқи байналмилалии пул тасдиқ кард, ки маҷмӯи маҳсулоти дохилии кишвари мо бори аввал аз 100 миллиард доллар гузашт.
Дар панҷ соли оянда ба 160 миллиард доллар расонидани ин нишондод чун ҳадаф муқаррар гардидааст. Бино ба анҷоми чоряки якуми соли 2025 суръати рушди иқтисоди кишвари мо 6,8 фоизро ташкил дод.
Дар солҳои охир Ӯзбекистон беш аз 70 миллиард доллар сармояи хориҷиро азхуд кардааст. Беш аз 14 миллиард доллар маблағи Институти байналмилалии молия ба соҳаҳои иҷтимоӣ ва инфрасохтор ҷалб карда шуд.
То соли 2030 аз 50 дарсад зиёд кардани ҳиссаи манобеъи “сабз” дар энергетика пешбинӣ шудааст.
Ӯзбекистон мамлакате мебошад, ки захираҳои бузурги сарватҳои зеризаминӣ ва маъданҳои нодир дорад.
Дар бораи дастгирии соҳибкорӣ қарорҳои муҳим қабул карда шуданд. Дар натиҷа, беш аз дусад литсензия ва иҷозатнома бекор карда шуда, шумораи умумии андозҳо аз 13 ба 9 ва арзиши баъзеашон ду баробар кам карда шуд.
Бозори валюта озод карда шуда, тамоми маҳдудиятҳо аз рӯёи репатриатсияи даромадҳо бекор гардиданд. Меъёри андоз аз арзиши иловашуда аз 15 фоиз ба 12 фоиз кам карда шуд. Андози фоида вобаста ба намуди фаъолият аз 5 то 15 фоиз муқаррар карда мешавад.
Корхонаҳое, ки дар соҳаи кишоварзӣ ва иҷтимоӣ фаъолият мекунанд, аз пардохти андози фоида комилан озод карда шудаанд.
Дар мамлакати мо соле 25 миллион тонна меваю сабзавоти хушсифат рӯёнда мешавад. Ҳамасола ба маблағи 2,5 миллиард доллар меваю сабзавот ва маҳсулоти хӯрокворӣ содир мегардад.
Инчунин, дар чорабинӣ гуфта шуд, ки кишвари мо бо бисёре аз кишварҳои ҷаҳон низоми тиҷории имтиёзнок дорад ва аз тоҷирони эронӣ даъват карда шуд, то аз имконоти минтақаҳои саноатии вилоятҳои Хоразм ва Самарқанд бештар истифода кунанд.
Барои маълумот: дар форуми тиҷоратии Ӯзбекистон - Эрон беш аз 100 нафар соҳибкорон, намояндагони вазорату идораҳои кишвари мо бо пешниҳоду ташаббусҳои пешқадам дар самтҳои гуногун иштирок намуда, дар формати «В2В» гуфтушунидҳо анҷом доданд.
