Бу ҳақда Ўзбекистон Миллий олимпия қўмитаси раисининг биринчи ўринбосари Отабек Умаров жума куни журналистлар билан учрашувда маълум қилди.

Унинг сўзларига кўра, ўзбекистонлик футболчи Абдуқодир Ҳусановнинг «Манчестер Сити»га ўтиши аллақачон инглиз клубига минтақадан миллионлаб янги мухлисларнинг қўшимча эътиборини тортган.

«Ўзбекистонда 37−38 миллион халқимиз бўлса, Ўрта Осиёнинг бошқа давлатлари ҳам шу футболчимиз сабаб „Манчестер Сити“ жамоасини мунтазам равишда кузатиб бораётган мухлислари қаторига қўшилишди», — деди Умаров.

Унинг сўзларига кўра, City Football Group’нинг яна бир ўзбекистонлик футболчини таклиф қилиш ва ўзбек клубини халқаро гуруҳга қўшиш режалари бор. «Ўзбекистондан бир спорт клубини, уларнинг ҳозирги гуруҳида 12 та спорт, футбол жамоаси бўлса, 13-командани, Худо хоҳласа, Ўзбекистондан олиш ниятида юришибди», — деди у.

Умаровнинг таъкидлашича, август ойида Ўзбекистон делегацияси Англияга ташриф буюриб, жамоа тайёргарлиги, селекция ва ўйинчиларни тайёрлаш жараёни билан танишиши режалаштирилган.

«Биз бир қатор режаларни белгилаб олдик. Бу йўналишда ҳали қиладиган ишларимиз кўп», — деди МОҚ раисининг биринчи ўринбосари.