2025-жыл 1-сентябрьден "Ғишткўприк", "Зангиота" ҳәм "Даўыт ата" шегара өткериў пунктлеринде автотранспорт қураллары ушын қәўиплерди басқарыў принциплерине тийкарланған "жасыл" ҳәм "қызыл" - еки коридорлы система иске түсириледи.
Әпиўайы етип айтқанда, енди қәўип дәрежеси төмен болған, яғный "жасыл" коридорға түскен автотранспорт қураллары ҳәм оған жүкленген товарларды бажыхана тексериўинен өткериўге зәрүрлик болмайды, тек ғана ҳүжжетлер көзден өткериледи.
Бул системаны иске түсириўдиң ең әҳмийетли шәртлеринен бири сонда, онда автотранспорт қураллары инспекциялық көрик комплексинен өткерилип, қадағалаўдан өткерилгеннен соң ғана бул әмелият қолланылады.
Буның ушын болса автомобиль шегара өткериў пунктлери инспекциялық тексериў комплекслери менен толық тәмийинленген болыўы керек.
Усы ўақытқа шекем Өзбекстандағы автотранспорт қураллары ҳәрекетленетуғын шегара бажыхана постлары тийкарынан жүк автотранспорт қураллары ушын мөлшерленген ири инспекциялық тексериў комплекслери менен үскенеленген.
Енди болса тек ғана Орайлық Азияда емес, ал ҒМДА регионында биринши мәрте Өзбекстандағы бир қатар шегара бажыхана постларына жеңил автотранспорт қуралларын сканерлейтуғын заманагөй инспекциялық тексериў комплекси - Z портал қурылмасы орнатылмақта.
Бираз ўақыт алдын бул қурылмадан "Ғишткўприк" шегара бажыхана постына орнатылған болса, усы күнлерде "Наўайы" шегара бажыхана постларына орнатыў жумыслары жуўмақланбақта.
АҚШтың абырайлы «Rapiscan» компаниясы тәрепинен ислеп шығарылған бул комплекс арқалы саатына 220ға шекемги автотранспорт қуралларын сканерлеў мүмкин.
Ең әҳмийетлиси, онда айдаўшы да, жолаўшылар да салоннан түсиўине зәрүрлик қалмайды. Қурылма санитариялық қорғаў аймағын талап етпейди. Рентген нуры артқа қайтыў технологиясында ислеўи себепли денсаўлыққа зыян етпейди.
Инспекциялық көрик комплексин орнатыў жумыслары тиккелей АҚШтан келген қәнигелер менен биргеликте әмелге асырылмақта.
Еслетип өтемиз, усы жылдың өзинде бундай қурылмалар "Сырдәрья" ҳәм "Даўыт ата" шегара бажыхана постларына да орнатылады.
