Биринши мәрте шөлкемлестирилген форумда Қарақалпақстан Республикасы Жоқарғы Кеңеси, Қарақалпақстан Республикасы Жоқары билимлендириў, илим ҳәм инновациялар министрлиги, Германия халықаралық бирге ислесиў жәмийети (GIZ) ҳәм Қарақалпақстан Республикасында жумыс алып барып атырған кәсиплик билимлендириў шөлкемлери, министрликлер ҳәм кәрханалардың жуўапкерлери қатнасты.
Форум қатнасыўшылары дәслеп кәсиплик билимлендириў шөлкемлеринде дуал билимлендириўди жолға қойыў бойынша әмелге асырылып атырған жумыслар ҳәм олардың нәтийжелери бойынша шөлкемлестирилген көргизбе менен танысты.
Илажда шығып сөйлегенлер мәмлекетимизде жаслардың кәсип ҳәм қәнигеликлерди ийелеўге болған қызығыўшылығын қоллап-қуўатлаў ушын кең имканиятлар жаратыў, соның менен бирге, кәсиплик билимлендириў системасында дуал билимлендириўди шөлкемлестириў бағдарында әмелге асырылып атырған жумысларға тоқтап өтти.
Дуал билимлендириў - экономиканы раўажландырыўда үлкен әҳмийетке ийе перспективалы бағдар есапланып, оқыўшы-жасларға билимлендириўди өз бағдарына сәйкес болған шөлкемде ислеў менен бирге алып барыў имканиятын беретуғын система есапланады. Онда жаслар 2-3 күн билимлендириў мәкемесинде теориялық билимлерди ийелесе, 3-4 күн даўамында кәрхана ҳәм шөлкемлерде ҳақыйқый жумыс процесинде әмелий көнликпелерге ийе болады. Әҳмийетлиси, дуал тәлим формасында билим алып атырған оқыўшылар кәрхана ҳәм шөлкемлерге жумысқа қабыл етилген ўақытта оларға кәрхана тәрепинен устаз бириктириледи ҳәм мийнет ҳақы төленеди.
Ҳәзирги ўақытта бул система Германия, Австрия, Швейцария ҳәм Корея Республикасы сыяқлы мәмлекетлерде экономика тармақларын раўажландырыўда үлкен әҳмийетке ийе болмақта.
Форумда шығып сөйлеўшилер республикамызда дуал билимлендириўди раўажландырыў перспективалары, бул бағдарда Германия мәмлекетиниң тәжирийбеси, дуал билимлендириўде оқыўшы, кәрхана, билимлендириў мәкемеси ҳәм мәмлекеттиң биргеликтеги жумыслары ҳаққында мағлыўматлар берди.
Атап өтиў орынлы, бүгинги күнде Қарақалпақстан Республикасында 31 кәсиплик билимлендириў шөлкеминде 745 кәрхана ҳәм шөлкемлер менен биргеликте дуал билимлендириў жолға қойылған болып, оларда 1716 оқыўшы кәсип ҳәм қәнигелик сырларын үйренбекте.
Бул бағдардағы нәтийжелиликти арттырыў мақсетинде келешекте Әмиўдәря, Қараөзек, Қоңырат районлары ҳәм Нөкис қаласындағы техникумларда 10 нан аслам кәсип ҳәм қәнигелик түрлери бойынша дуал билимлендириўди жолға қойыў, сондай-ақ, бул арқалы дуал билимлендириўге қамтып алыў дәрежесин 3000 оқыўшыға, оларда үйретилетуғын кәсиплердиң санын 20, бирге ислесиўши кәрхана ҳәм шөлкемлердиң санын 1000 ға жеткериў режелестирилгени атап өтилди.
Форум шеңберинде кәсиплик билимлендириў шөлкемлери менен министрликлер ҳәм кәрханалар арасында дуал билимлендириўди жолға қойыў бағдарында бирге ислесиў бойынша тийисли шәртнамаларға қол қойылды.
Минажатдин Қутлымуратов,
«Янги Ўзбекистон» хабаршысы.
