Жорий йил 25 январь куни ўтказилган тезкор тадбирда 5 нафар фуқаролар ўзаро жиноий гуруҳ ташкил қилишиб, Нишон тумани “Ширинобод” маҳалласи ҳудудидан кесиб ўтувчи “Epsilon Development company” МЧЖ шаклидаги хорижий корхонага тегишли газ конденсати қувурини тешиб, жўмрак ўрнатиш орқали қиймати 17,4 млн сўмлик 8,9 тонна конденсат ёқилғисини ўғирлаб чиққан вақтда далилий ашёлар билан ушланган.
Бу ҳақда Бош прокуратуранинг матбуот хизмати маълум қилди.
Олиб борилган текширув ҳаракатлари давомида мазкур жиноий гуруҳ томонидан жами 1,1 млрд. сўмлик 568,5 тонна газ конденсати ёқилғиси талон-торож қилинганлиги аниқланган.
Мазкур ҳолат юзасидан Қарши ихтисослаштирилган прокуратураси томонидан Жиноят кодексининг 169-моддаси 4-қисми “а” банди билан жиноят иши қўзғатилиб, 5 нафар шахс процессуал тартибда ушланган.
Ҳозирда дастлабки тергов ҳаракатлари олиб борилмоқда.
