— Компьютерим эски бўлишига қарамай, жуда кўп дастурларда қатнашиб, IT соҳасини мукаммал эгаллашга ҳаракат қилдим. Илк дастуримни ишлаб чиққанда анча кичик эдим, — дейди Асадбек. — Кейинчалик Uzbekcoders каби лойиҳаларда қатнашдим. Айнан OMUC сабаб шуни тушундимки, IT одамнинг ортидан қувлаб юрадиган касб. Ўша пайтлардаёқ ишлаш учун кўп таклиф тушарди. Эслаб қолганим: бир сафар 600 доллар маошли иш таклиф этилган. Пул қанчалик керак бўлмасин, ўрганишни давом эттиришни танладим. Чунки мақсадим фақат кўп пул топиш эмас, соҳанинг ҳақиқий мутахассиси бўлиш ва келажакда ўз компаниямга асос солиш эди.
Асадбек мактаб ўқувчиси бўлишига қарамай, “Bestarorg” номли жамоа ташкил этди. Жамоа, асосан, сайт яратиш билан шуғулланади. Бир неча халқаро ва маҳаллий олимпиадада ҳам қатнашиб, ғолибликни қўлга киритган.
— Бир сафар Инновацион ривожланиш вазирлиги (ҳозирги агентлик) ташкил этган марафонда иштирок этдик. Меҳнатимиз қадр топиб, лойиҳамизни молиялаштириш учун пул мукофотини қўлга киритдик. Жамоадошларим орасида энг кичиги мен эдим. Ўша ердаги раҳбарлардан бири ёнига чақириб: “Сен бунча нарсани қаердан ўргангансан? Бўлиши мумкин эмас-ку”, деб ажабланди. Мен билимимнинг асосий қисмини Uzbekcoders дастурида ўрганганимни айтдим.
Мутасаддилар ўсмирдаги шижоатни кўриб, қўллаб-қувватлаш мақсадида унинг жамоаси учун вазирлик лабораториясидан жой ажратиб беради. Бундан илҳомланган жамоа бирин-кетин Adiblar, Eyemed, Smart Automation System каби дастурларни ишлаб чиқади. Adiblar иловаси миллатимизни дунёга танитган буюк аждодларимизнинг 5000 дан зиёд асарини жамлаган илова бўлиб, бугун 1000 дан ортиқ фаол фойдаланувчиси мавжуд.
Eyemed эса барча турдаги қурилмалар (телефон, компьютер, телевизор)дан фойдаланганда кўриш қобилиятини сақлаш ва пасайишининг олдини олишга мўлжалланган илова. Ҳозир унинг 100 дан ортиқ фойдаланувчиси бор. Айнан шу илова билан жамоа халқаро IT тадбиркорлиги ҳакатон олимпиадасида иштирок этиб, 3-ўринни қўлга киритди ва 2400 доллар пул мукофоти ютди.
Smart Automation System дастури симсиз алоқа орқали бир-бирига боғланган ва кундалик юмушларни янада осон қилиш учун уйда ўрнатилган электрон қурилмалар ҳамда сенсорларни бошқарувчи илова. Мобиль телефон орқали бошқарилади. Хорижда бундай лойиҳанинг нархи 5000-30000 доллар атрофида баҳоланар экан, Асадбекнинг жамоаси эса уни 7-10 баробаргача арзон ва сифатли ишлаб чиқишга ҳаракат қилмоқда.
