Сессия кун тартибидан АЭХАнинг техник ҳамкорлик соҳасидаги фаолиятини кўриб чиқиш ва 2024-2025 йилларга мўлжалланган янги техник ҳамкорлик дастурини тасдиқлаш масалалари ўрин олди.
АЭХА Бошқарувчилар кенгаши техник ҳамкорлик дастурини тасдиқлади, унга кўра, Ўзбекистоннинг бешта янги миллий лойиҳаси янги циклда амалга оширилади. Улардан учта лойиҳа яратилаётган атом саноати инфратузилмасини ривожлантириш бўйича миллий салоҳиятни ошириш («Ўзатом» агентлиги), атом энергетикасини самарали тартибга солиш ва назорат қилиш бўйича меъёрий-ҳуқуқий базани мустаҳкамлаш («Ўзсаноатконтехназорат»), шунингдек, ядровий хавфсизлик, Ўзбекистон тадқиқот ядро реакторининг фойдаланиш кўрсаткичларини ошириш ва самарали фойдаланишга (Фанлар академияси) қаратилган.
Тўртинчи лойиҳа Сув ресурслари ва барқарор изотоплардан фойдаланган ҳолда ифлосланиш манбаларини мониторинг қилиш учун барқарор изотоп лабораториясини ташкил этишни назарда тутади. Лойиҳа Экология, атроф-муҳитни муҳофаза қилиш ва иқлим ўзгариши вазирлиги ҳузуридаги Гидрометеорология хизмати агентлиги томонидан амалга оширилади.
«Саратонни даволашда радиациявий тиббиётни кенгайтириш ва мустаҳкамлаш» деб номланган бешинчи лойиҳа Ўзбекистонда илғор ва юқори сифатли нур терапияси, диагностик радиология ва бошқа ядро тиббиёти технологияларини жорий этиш орқали саратон касаллигидан ўлим даражасини камайтиришни назарда тутади. Лойиҳа тиббиёт ходимларининг малакасини ошириш, саратоннинг турли турларини ташхислаш ва даволаш бўйича миллий тавсияларни ишлаб чиқиш, тиббиёт ходимларини кенг қамровли тайёрлашни назарда тутади.
АЭХА Бошқарувчилар кенгаши аъзолари Ўзбекистон доимий вакили, элчи Бахтиёр Ибрагимовнинг нутқини тингладилар, республиканинг Агентлик ва Техник кооперация департаменти билан ижобий ҳамкорлиги қайд этилди. Улар Агентлик ва Техник кооперация департаментига мамлакат ядро саноатини ривожлантириш учун миннатдорлик билдиришди. Шунингдек, АЭХАнинг ядровий технологиялардан тинч мақсадларда фойдаланишга қаратилган янги ташаббусларини қўллаб-қувватлаш, шунингдек, ҳамкорликни янада ривожлантиришга қизиқиш тасдиқланди.
