Арманистон Мудофаа вазирлиги Озарбайжон қуролли кучлари томонидан ўққа тутилиши оқибатида чегарадаги Хознавар қишлоғидаги турар-жой биносига зарар етганини маълум қилди.
“23 апрель куни тахминан 22:20 (Москва вақти билан 21:20) Озарбайжон Қуролли кучлари бўлинмалари Сюник вилоятининг Хознавар қишлоғи йўналишида ўт очди, оқибатда турар-жой биносига зарар етди. Жабрланганлар йўқ”, дея хабар берди Арманистон ҳарбий бошқармаси матбуот хизмати.
Ереван Озарбайжон томонини Хознавардаги турар-жой биносининг ўққа тутилиши бўйича текширув ўтказишга ва жамоатчиликка тушунтириш беришга чақирди, деб хабар беради tass.ru.
“Эслатиб ўтамиз, Арманистон Республикаси Бош вазири идораси ўт очишни тўхтатиш режимини бузиш ҳолатларини текшириш учун Арманистон-Озарбайжон қўшма механизмини яратишни таклиф қилган эди. Бироқ, Озарбайжон бу таклифга ҳали ҳам жавоб бермади”, дея таъкидлади департамент.
