Шунинг учун Аллоҳнинг яратганлари ҳақида тафаккур қилинади, барчамизни атрофимиздаги ҳар бир нарса ҳақида фикр юритиб, ибратланишга, яратиб қўйилган беҳисоб неъматлар учун шукрона айтиш буюрилган. “Бирни кўриб фикр қил, юзни кўриб шукр қил” деган байт мағзида ҳам ана шу маъно мужассам.
Тўрт мучамиз соппа-соғ, шундай тугал ҳаётга эгалигимиз, унинг қанчалик бебаҳо неъмат эканини ҳис қилиб, шукр қилиб яшашимиз кераклигини корона вирус пандемияси, Бухорода рўй берган тўфонлар ва Сардоба тошқинлари ҳар биримизни огоҳ этиб турибди. Биз улар келтирган фожеалардан сабоқ олар эканмиз, халқ, миллат бўлиб жипслашяпмиз. Синовлар элимиз иродасини тоблаяпти, қалбларимизга меҳр-мурувват, саховат туйғуларини индириб, биродарларимизга баҳоли қудрат ёрдам беришга чорлаяпти.
Бунга тошқиндан азият чекканлар ҳузурига бораётганда кўриб, кузатиб амин бўлдим. То Жиззахга етгунча йўл бўйи кетаётган саховат карвонларининг кети узилмайди. Улар сафида ташкилоту идоралар билан бир қаторда оддий фуқаролар, маҳалла кўй вакиллари ўз автомобилларига хайрия юкларин ортиб, биродарларимизга ҳаминқадар бўлса-да, кўмак бўлсин, дея йўлга отланишган. Менинг назаримда, шу кунларда магистралларимиз савоб ва эзгулик йўлига айланган. Шундай кезда юрагингиз беихтиёр эзгу зиёга тўлади, қўлингиз дуога очилади. Яратгандан юртга тинчлик-хотиржамлик, жабр кўрганларга сабр-тоқат тилаймиз.
Ёшим саксонни қоралаб боряпти. 50-йиллардаги нонга зорликларни кўрдик, шундан кейинги замонларнинг қувончу ташвишларни бошдан ўтказиб келяпмиз. Шукр, Ҳаж зиёратида бўлдим. Бугунги кунда маҳалла фаоли ва халқ депутатлари Тошкент тумани кенгаши депутати сифатида жамоат ишларига ҳисса қўшишга ҳаракат қиламан. Кейинги пайтда кам таъминланган оилаларни моддий-маънавий қўллаб-қувватлашга, томорқадан унумли фойдаланиш орқали улар даромадини ошириш бўйича қатор ишларни амалга оширдик.
Сардобада рўй берган воқеаларни ойнаижаҳонда кўриб, рўзномаларда, шу жумладан ”Янги Ўзбекистон”да сув босган ҳудудлардан кўчирилаётганларни ўз бағрига олаётганлар ҳақида ҳароратли мақолаларни ўқиб, бизнинг ҳам тинчимиз йўқолди. Жиянларим билан маслаҳатлашиб, учта “Газел” русумли юк ва тўртта енгил автомашиналарга 2,5 тонна ун, 500 килограм шакар, шунча макарон, ёғ, картошка ва уст- бош кийимлар, болалар ўйинчоқларини ортиб йўлга чиқдик. Жиззах шаҳрига эрта тонгда етиб келдик. Шаҳарга кираверишда ЙПХХ ходимларига ниятимизни айтган эдик, улар Олимпия захиралар коллежига қадар кузатиб қўйишди.
Олиб борган хайрия юкларини катта спорт залига туширдик. Коллеж ўқувчилари ётоқхонасига кўплаб оилалар жойлашган экан. Биз улар билан хам учрашиб, ҳол-аҳвол сўрадик,бу кунлар тезроқ ўтиб кетишини, эртанги кунлар саодатини тилаб, эзгу ниятлар қилдик. Уларнинг хотиржамлиги, эртанги кунга ишончидан руҳимиз кўтарилди. Ҳа шундай, ҳеч кимга ўхшамас ва ҳеч кимдан кам бўлмас сабр-бардошли, танти ва бағрикенг халқимиз бор. Улар Президентимиз раҳнамолигида ҳар қандай балои қазо тоғини талқон қилиб ташлашга қодир. Буни бугунги кун синовлари амалда исботлаб турибди.
Ана шундай кўнгилни ёриштирувчи туйғулар билан яшаш жойимизга, Тошкент туманидаги Олтинтепа қишлоғига қайтиб келдик. Маҳалламизда бундай йўл тутаётган фақат биз эмасмиз. Улар ҳам Сардоба воқеаларидан азият чекканларга хайру саховат кўрсатишда ўз ҳиссалари билан иштирок этяпти.
Буюк боболаримиздан мерос тафакур хазиналари, авлодлардан авлодларга ўтиб келаётган инсонийлик фазилатлари бугунги кунда янгидан янги эзгу анъаналар билан бойиб, собитлашиб боряпти. Бирни кўриб фикр, бирни кўриб шукр қилмоқ ҳикмати қалбимизда доимо пойдор бўлсин.
Мирислом УСМОНОВ,
Халқ депутатлари Тошкент тумани кенгаши депутати
