Ҳолат Болалар омбудсмани томонидан назоратга олингани маълум қилинди.
Аниқланишича, 2024 йил 9 октябрь куни Оққўрғон туманида жойлашган 6-умумтаълим мактабининг информатика фани ўқитувчиси М.А (1990 йилда туғилган эркак) мазкур фандан қўшимча дарс ўтаётган вақтида 9-синф ўқувчиси вояга етмаган О.С (2009 йилда туғилган ўғил бола) дарс жараёнида ўқитувчини гўёки чалғитгани туфайли ўқитувчи ўқувчи О.С.ни ҳақорат қилиб, уриб дўппослаган.
Ҳозирда ушбу ҳолат юзасидан Оққўрғон туман ИИБ томонидан терговга қадар текширув ҳаракатлари олиб борилмоқда.
Вояга етмаган О.С.га нисбатан жароҳат даражасини аниқлаш бўйича судга оид тиббий экспертиза тайинланган.
Вилоят мактабгача ва мактаб таълими бошқармаси эса ўқитувчи интизомий жазога тортилганини маълум қилди.
Ўрганишлар натижасида маълум бўлишича, ўқувчи О.С, дарс вақтида ўқитувчига нисбатан ҳурматсизлик кўрсатгани, ўқувчиларга дарсни ўзлаштиришда халақит берганлиги сабабли, ўқитувчи М.А томонидан бир неча бор огоҳлантирилган. Шунга қарамай О.С турли кўракда турмайдиган сўзлар билан ўқитувчини ҳақорат қилган.
Натижада ўқитувчи М.А дарс тугагач ўқувчини жазоламоқчи бўлган ва ижтимоий тармоқларда тарқалган ҳолат юзага келган.
Ҳолатни шу куннинг ўзида мактаб маъмурияти назоратга олган, ўқитувчининг хатти-ҳаракатини қоралаб, унга нисбатан интизомий жазо қўлланилган. Ўқувчининг ота-онаси ҳам мактабга чақиртирилган, огоҳлантирилган.
Шу ўринда яна бир маълумот, ўқувчи О.С. сентябрь ойида ҳам мактабда тартибсизлик қилгани сабабли унинг ота-онаси Маъмурий жавобгарлик тўғрисидаги кодекснинг 47-моддасида белгиланган тартибда жавобгарликка тортилган.
Айни пайтда, ўқувчи мактабнинг ички назоратига олинган ўқувчилар рўйхатида туради.
