“Буюк Британиянинг тараққиёт омиллари, инглизлар характери...”  Англияда таҳсил олаётган ҳамюртимиз билан суҳбат

    Суҳбат 3 сентябр 2020 4892

    «Янги Ўзбекистон» нашри чет элдаги ватандошларимиз билан интервьюларни давом эттиради. Навбатдаги суҳбатдошимиз Буюк Британиядаги Ҳуқуқшунослик университетида таҳсил олаётган юртдошимиз Садрижаҳон Ҳасанов бўлди.

    Садрижаҳон ўқиш билан бирга Ўзбекистон умумжаҳон ёшлар ассоциациясининг Буюк Британиядаги вакили вазифасини ҳам бажариб келмоқда.

    М.: Садрижаҳон бакалаврда ўқиш учун Буюк Британияни танлашингизга айнан нима сабаб бўлган?

    С.Ҳ.: Очиғи, болаликдан Буюк Британияда суратга олинган детектив жанрдаги фильмларни томоша қилиб, ушбу мамлакатга бориш учун қизиқиш пайдо бўлган эди. Шу билан бирга, жаҳон эътироф этган кўплаб нуфузли олийгоҳлар ҳам айнан шу ерда жойлашган.

    Аслида Ўзбекистонда ҳам бир нечта университетлар талабаси бўлган эдим. Қолаверса, Дубай шаҳридаги халқаро университетга ҳам 100 фоизлик грант ютиб олгандим. Бироқ, Буюк Британияда таълим олиб, шу ердаги тажрибани ўрганиб келгусида Ўзбекистонга қайтсам давлатимизга кўпроқ фойдам тегади деб, ўйладим.

    Мана шу сабаблар туфайли ҳозир Лондонда Ҳуқуқшунослик университетида таҳсил оляпман.

    Университетимиз 1962 йил ташкил этилган. Умумий 17 та кампусга эга. Бир сўз билан айтганда, талабалар учун барча қулайликлар мавжуд.

    М.: Буюк Британиянинг тараққиёт омилларини нималарда кўряпсиз?

    С.Ҳ.: Бу ерга келиб эътиборимни тортган жиҳат одамларнинг асосий вақтларини китоб мутолааси билан ўтказиши бўлди. Ўйлашимча, инглизларнинг айнан китобсеварлиги тараққиётининг энг катта омилларидан бири. Яна бир диққатимни тортган ҳолат жамоат транспортларида маҳаллий нашрларнинг кунлик сонлари тарқатилиши ва кун охирига етмасдан газеталарнинг тугаб қолишини айтишим мумкин.

    Қолаверса, инглизлар қуруқ ва баландпарвоз гаплардан кўра кўпроқ фактларга таянади. Бу ерда айтилган гап рақамлар ва статистикага таянмаса бирор бир кучга эмас. Энг асосийси давлат бўладими ёки хусусий сектордами ривожланиш лойиҳалари узоқ муддатли қилиб тузилади. Масалан, бирор бир давлат ишида ишлайдиган одамдан нима билан банд эканлигини сўрасангиз 5-6 йил олдин ишлаб чиқилган лойиҳалар ижроси билан бандлигини айтишади. Бу ўз-ўзидан мамлакатдаги одамлар характерига ҳам сингиб кетган. Ўйлашимча, инглизларнинг кўплаб ижобий тажрибаларини мамлакатимиз ривожи йўлида фойдалансак яхши самара бера олади. Албатта биринчи ўринда қонун устуворлигини таъминлаш керак.

    Шунингдек, маҳаллий аҳолининг солиқ саводхонлиги ҳам юқори. Солиқдан қочиш ёки бўйин товлашга қатъий жазо чоралари қўлланилади. Яқинда ўқиган маълумотимга кўра, Буюк Британия сайёҳлардан ўртача йиллик 106 миллиард даромад топади ва бу орқали 2 миллионга яқин одам иш ўрнига эга бўлган.

    М.: Ўзбек ва инглизларнинг характер нуқтаи назаридан ўхшаш жиҳатлари борми?

    С.Ҳ.: Халқларимиз дунё қараши, қадриятлари ва албатта дин нуқтаи назаридан ҳам тубдан фарқ қилади. Ўйлашимча, инглизларда бизларга нисбатан тартиблилик анча яхши шаклланган. Болаларга кичкиналигидан бошлаб мустақил фикрлаш, қарор қабул қилишга ва ўзлари қабул қилган қарорга масъулиятни ўз бўйниларига олишга ўргатилади. Бироқ камчиликлар ҳам йўқ эмас. Мисол учун, кеча расмий кийиниб олган жентльменни дам олиш кунлари ўзини танимайдиган даражада ичиб олиб майхона олдида юмалаб ётиши одатий ҳолат. Шу билан бирга, аксарият инглизлар бир дастурхон атрофида оилавий ўтириш каби меҳр-муҳаббат тушунчасини унутиб қўйишган.

    М.: Бўш вақтларингизда нималар билан шуғулланасиз?

    С.Ҳ.: Ўқиш билан бирга ишлайман ҳам. Шунинг учун бўш вақтларим кўп бўлавермайди. Лекин спорт билан шуғулланиш ва китоб мутолааси кундалик ишларимдан. Масалан, тенгдошларимга «Самарали инсонларнинг 7 одати» номли китобни албатта ўқиб чиқишни тавсия бермоқчиман. Китобда инсон ўзи билмаган ҳиссиётлари, муваффақият ва самарадорлик учун қандай хислатлар керак эканлиги ҳамда энг асосийси уларни қандай қилиб шакллантириш мумкинлиги ҳаётий мисоллар билан тушунтириб берилган. Қолаверса, Ютуб тармоғида блогер сифатида Буюк Британия ҳақида қизиқарли ва фойдали видеолар тайёрлаб жойлаб келяпман.

    Шунингдек, Телеграм мессенжерида Буюк Британиядаги ўзбекистонликларни бирлаштирган «Ўзбек жамияти» гуруҳини ташкил қилганман. У орқали нафақат дўстона суҳбатлар, балки қийинчиликка учраб қолган ватандошларимизга Ўзбекистон умумжаҳон ёшлар ассоциациясининг вакили сифатида ёрдам бериб келаман.

    М.: Келажакдаги режаларингиз қандай?

    С.Ҳ.: Аввало, ўз соҳамнинг етук мутахассиси бўлиш энг катта мақсадларимдан бири. Келгусида албатта бу ерда орттирган билим ва тажрибаларимни Ўзбекистонга қайтиб юртимиз ривожига сарфлайман.

    Фурсатдан фойдаланиб ватандошларимизни Мустақиллигимизнинг 29 йиллиги билан чин дилдан табриклайман! Юртимизга тинчлик ва халқимизга соғлик-саломатлик тилайман.

    Нурилло Тўхтасинов суҳбатлашди

    No date selected
    март, 2024
    1
    2
    3
    4
    5
    6
    7
    8
    9
    10
    11
    12
    13
    14
    15
    16
    17
    18
    19
    20
    21
    22
    23
    24
    25
    26
    27
    28
    29
    30
    31
    Use cursor keys to navigate calendar dates