“MEDEF International” ҳозирда турли соҳалардаги 800 000га яқин француз компанияларини бирлаштиради. Ана шу салоҳиятни ҳисобга олган ҳолда учрашув чоғида Ўзбекистон энергетика соҳасида Франция компаниялари билан ҳамкорликда амалга оширилаётган лойиҳалар, янги истиқболли таклифлар атрофлича муҳокама қилинди.

Хусусан, жорий йилнинг май ойида Самарқанд вилоятида 100 МВт қувватга эга қуёш фотоэлектр станцияси ишга туширилди. Давлат-хусусий шериклик (ДХШ) асосидаги лойиҳа Франциянинг “TOTAL Eren” компанияси томонидан амалга оширилди. Ушбу қуёш фотоэлектр станцияси бугунги кунга қадар 909 минг кВт.соат электр энергияси ишлаб чиқарди.

Таъкидланганидек, “TOTAL Eren” компанияси Ширин шаҳридаги ихтисослашган энергетика коллежи битирувчилари орасидан ходимларни ишга жалб қилишни кўриб чиқиш имкониятига эга бўлиб, коллежда техник кадрлар тайёрлаш, шу жумладан қуёш фотоэлектр станцияси учун инглиз тилини чуқур ўрганиш бўйича илғор тажрибалар жорий этилмоқда. Франциянинг яна бир компанияси – EDF Ўзбекистонда иссиқлик электр станцияларини қуриш бўйича 2 та йирик лойиҳада консорциум таркибида қатнашади.

Музокаралар чоғида томонлар қайта тикланувчи энергия манбалари асосида ишлаб чиқаришни жорий этишда диспетчерлик ва тармоқ барқарорлигини таъминлаш соҳасида тажриба алмашиш, қайта тикланувчи энергия манбалари лойиҳалари бўйича янги тендерларда француз компанияларининг иштироки, электр трансформаторларининг ёнғин хавфсизлиги соҳасидаги француз ишланмаларини жорий этиш ва бошқа йўналишлардаги имкониятларни муҳокама қилдилар.

Муҳокама қилинган қатор ҳамкор лойиҳаларни батафсил ишлаб чиқиш бўйича келишувларга эришилди.