Бу ҳақда президентнинг махсус текширувчиси Мустафо Муллавий маълум қилди.
Унинг сўзларига кўра, Қазвин вилоятидаги йўл бўйидаги ёқилғи қуйиш шохобчасида бензин олинган, бироқ кейинчалик аниқланишича, ушбу бензинга сув аралаштирилган бўлган. Бу ҳолат учала автомашинанинг ҳам йўлда ишдан чиқишига олиб келган.
Муллавийнинг таъкидлашича, ушбу ҳодиса Ашуро байрами олдидан содир бўлган. Президент Пезешкиён бу ҳолат юзасидан ҳеч қандай расмий шикоят қилмаган ва ҳокимият билан боғланмаган. У сафарини таксида давом эттириб, Тебризга етиб борган.
Мустафо Муллавий Қазвин вилояти ҳокимиятида 24-июль куни ўтказилган йиғилишда сўзга чиқиб, ушбу ёқилғи шохобчасида аввал ҳам сифатсиз, сув қўшилган бензин сотилган ҳолатлар аниқланганини маълум қилди.
Мазкур ҳолат юзасидан тегишли чоралар кўрилиши кутилмоқда.
