Эрон ҳукумати чоршанба куни ҳаддан ташқари иссиқлик шароитида энергия сарфини камайтириш мақсадида бир қанча вилоятларда давлат идораларини ёпишни буюрди.
IRNA ахборот агентлиги маълумотларига кўра, мамлакатнинг 31 вилоятидан камида 15 таси давлат идораларини бутунлай ёпади ёки қисқартирилган иш вақтига ўтади.
Шимоли-ғарбда Ғарбий Озарбайжон ва Ардабил, жанубда Ҳормозгон, шимолда Алборз ва пойтахт Теҳрон иссиқдан зарар кўрган ҳудудлардир.
Теҳрон губернатори Муҳаммад Содиқ Мотамедияннинг айтишича, бу қарор Энергетика вазирлиги талабига биноан қабул қилинган ва “сув ва электр тармоқларида ресурслар истеъмолини бошқариш”га қаратилган.
Бироқ, фавқулодда вазиятлар ва муҳим хизматлар ишлашда давом этади.
Эрон энергетика вазири Али-Акбар Меҳрабианнинг айтишича, гарчи расмийлар энг ёмон ҳолатда электр энергияси истеъмоли максимал 6 фоизга ошишини кутишган бўлса-да, мисли кўрилмаган иссиқлик мамлакатда электр энергияси истеъмолини 9 фоизга оширган.
Эронда июль ойи ўрталаридан буён ғайритабиий юқори ҳарорат кузатилмоқда, жанубий вилоятларда ҳаво ҳарорати 50°C дан ошди. Бу электр тармоғига ҳаддан ташқари юкламанинг ортишига ва бутун мамлакат бўйлаб электр энергиясининг кенг кўламли узилишларига олиб келди.
Расмийлар, шунингдек, сув омборларидаги сув сатҳининг камайиши сабабли Теҳрон сув таъминоти тизимидаги босимни камайтиришга мажбур бўлди. Маҳаллий матбуот ҳозирги қурғоқчиликни сўнгги юз йилдаги энг ёмони деб атамоқда, деб хабар берди inform.kz.
