Таъкидланганидек, лойиҳа билан Фуқаролик процессуал кодексига янги институт жорий этилмоқда. Унга кўра, соддалаштирилган тартибда иш юритиш агар даъвонинг баҳоси юридик шахсларга нисбатан базавий ҳисоблаш миқдорининг йигирма бараваридан, якка тартибдаги тадбиркорларга нисбатан ўн бараваридан, фуқароларга нисбатан эса беш бараваридан ошмаса, даъво аризалари бўйича ишлар соддалаштирилган иш юритиш тартибида кўриб чиқилиши белгиланмоқда.
Соддалаштирилган иш юритиш тартибидаги иш даъво аризасини иш юритишга қабул қилиш ва иш қўзғатиш ҳақида ажрим чиқарилган кундан эътиборан йигирма кундан ошмаган муддатда кўриб чиқилиши кўзда тутилмоқда.
Қонун лойиҳасининг қабул қилиниши юртимизнинг “Бизнес юритиш” индекси Контрактлар ижросини таъминлаш индикаторида ўз кўрсаткичларини яхшилашга, тадбиркорлик субъектларининг, шу жумладан юридик шахсларнинг одил судловга эришиш даражасини оширишга ва уларнинг ортиқча сарф-харажатларини тежашга хизмат қилади.
