Қўшма Штатларда Жон Кеннедининг ўлдирилиши билан боғлиқ 13 000 архив ҳужжатлари махфийликдан чиқарилди.
Бироқ бу иш бўйича 515 та файл ошкор этилмайди, чунки уларнинг нашр этилиши АҚШ хавфсизлигига зарар етказиши мумкин, деди президент Жо Байден. Яна 2545 таси жамоатчиликка қисман ёпиқ қолади.
Тарихчилар ҳужжатлар 1963 йил ноябрида Далласда отиб ўлдирилган президент Кеннедининг ўлими ҳақида кўпроқ маълумот беради, деб умид қилмоқда.
Бир йил ўтиб якунланган тергов президентни илгари Совет Иттифоқида яшаган америкалик Ли Харви Освалд отиб ўлдирганини кўрсатди. Шунга қарамай, кўплаб фитна назариётчилари бу ишга Марказий разведка бошқармаси (ЦРУ) аралашган бўлиши мумкин, деб ҳисоблашади.
