Колорадо Олий суди 14-тузатишга мувофиқ, собиқ президент Дональд Трампга Республикачилар партиясининг праймеризларида қатнашишни тақиқлади. Шу каби ишлар бошқа штатларда кўриб чиқилаётган бўлса-да, Колорадо Трампнинг 2021 йил 6 январда Капитолийга бостириб кирилишидаги роли туфайли президентликка номзодини қўйишни тақиқлаган биринчи штат бўлди.

Штат олий суди эса Трамп аввало Олий судга мурожаат қилиши учун қарорни 4 январга қолдирди. Унгача унинг номи сайлов бюллетенида қолади.

2024 йилги сайлов олдидан 25 дан ортиқ штатда Трампнинг бўлажак сайловларда иштирок этишига қарши даъволар очилган. Олти нафар сайловчининг илтимосига биноан олиб борилган Колорадо иши унинг сайловолди ташвиқоти учун энг катта таҳдиддир.

Трамп катта эҳтимол билан АҚШ Олий судида бу қарорга қарши чиқишга ҳаракат қилади. Трамп сайловолди кампанияси вакили Стивен Ченг “демократлар томонидан тайинланган” суд қарорини айблади ва қарор устидан зудлик билан АҚШ Олий судига шикоят қилишга ваъда берди. Колорадо Олий судининг барча етти нафар судьяси демократ губернаторлар томонидан тайинланган.

Колорадо иши 14-тузатишнинг учинчи бўлимига асосланган. Ушбу қоида Конституцияни қўллаб-қувватлашга қасамёд қилган ва қўзғолонда қатнашганларнинг давлат ёки федерал лавозимни эгаллашига йўл қўймасликка қаратилган, деб хабар беради korrespondent.net.