Ўзбекистон элчиси Аюбхон Юнусов Кувайтнинг "Star Fruit Co. for foodstuffs, vegetables and fruits" компанияси бош директори Абдураҳмон Сурур билан учрашув ўтказди.
Мулоқот чоғида жорий йил 13-14 май кунлари Кувайтда ўтказилган "Made in Uzbekistan" кўргазмасида эришилган келишувларни ҳаётга жорий этиш масалалари хусусида фикр алмашилди.
Кувайт томонига яна бир бор ўзбек маҳсулотларининг экспорти учун тақдим этилган имтиёзлар, хорижий импортёрлар учун яратилган қулайликлар ҳақидаги батафсил маълумот берилди.
Абдураҳмон Сурур Ўзбекистонда етиштирилган мева-сабзавотлар ўзига хос таъми билан харидоргир эканлигини айтиш баробарида, мамлакатимиздан гилос ва шафтоли экспорт қилишга тайёрлигини маълум қилди.
Музокаралар натижасида, Ўзбекистоннинг "S-Agro Termiz orchards" компанияси ва Кувайтнинг "Star Fruit Co." компанияси ўртасида ҳамкорлик ўрнатилди. Шунингдек, Кувайт томони билан Ўзбекистондан бир тонна гилос ва шафтоли сотиб олиш бўйича келишувга эришилди.
Дипломатлар, шунингдек, "Star Fruit Co." компаниясининг омборхонасида бўлдилар ва у ерда ҳўл мева ҳамда сабзавотларни сақлаш учун яратилган шароитлар билан танишдилар.
