Бу қутлуғ айём - янги тарихимиздаги энг улуғ санадир. Мустақиллик ҳар бир юртдошимизнинг ҳаётига янгича мазмун олиб кирди. Юртимизда амалга оширилаётган кенг кўламли ислоҳотлар халқимизнинг фаровонлигига хизмат қилмоқда.
Маълумки, мамлакатимизнинг мустақил тараққиёти солномасида Ўзбекистон либерал-демократик партиясининг ҳам муносиб ўрни бор. Партия салкам ўн саккиз йиллик фаолияти давомида мамлакатимизда ислоҳотларнинг фаол иштирокчиси бўлиб келмоқда. Турли лойиҳаларни амалга тадбиқ этиб келмоқда.
Ана шундай самарали лойиҳалардан бири “Ишбирламон аёл” кўрик танловидир. Беш йилдан буён ташкил этиб келинаётган ушбу танловда 10 минг нафар, бу йилги туман, шаҳар ва вилоят босқичларида эса 2 минг нафардан зиёд тадбиркор, ишбилармон ва фермер аёллар ўзларининг ишлаб чиқарган маҳсулотлари билан иштирок этди. Вилоят босқичида фаол иштирок этиб ғолибликни қўлга киритган 14 нафар тадбиркор ва фермер аёллар Республика босқичигача етиб келди.
Танлов иштирокчилари давлатимиз томонидан сўнгги беш йилда эркин ва фаровон жамият қуриш, аёлларни ижтимоий-иқтисодий фаоллигини, уларнинг давлат ва жамият ҳаётидаги ўрни ва мавқеини ошириш, оила институтини мустаҳкамлаш каби йўналишларда аввал мисли кўрилмаган тизимли ишлар ҳаётга татбиқ этилаётганини таъкидладилар. Энг асосийси - бу каби эътибор натижаси ўлароқ, мамлакат иқтисодиётининг таянч устунларидан бири бўлган кичик бизнес ва хусусий тадбиркорликни ривожлантиришда ҳам масъулиятни ўз зиммасига олишга тайёр хотин-қизларимиз етишиб чиқмоқда.
Ана шундай фидойи хотин-қизларнинг яратувчанлиги, бунёдкорлиги, меҳнатларини улуғлаш, жамоат ишларидаги ўрни ва мавқеини юксалтириш асосий вазифамиздир. Ушбу мақсад ва вазифалардан келиб чиқиб ташкил этилган кўрик-танловдан кўзланган асосий мақсад ҳам мамлакатимиз тараққиёти ва халқ фаровонлиги йўлида фаол иштирок этаётган тадбиркор ва фермер хотин-қизларни қўллаб-қувватлаш, ҳудудларда хотин-қизлар ўртасида оилавий тадбиркорликни жадал ривожланишини рағбатлантириш, хотин-қизлар тадбиркорлигининг илғор тажрибаларни оммалаштириш, тадбиркорликка оид касбий маҳорати ва билим даражасини ошириш учун зарурий шарт-шароит яратиш ва энг асосийси партия дастурий мақсад ва вазифаларни амалга оширишдан иборат.
Мустақиллигимизнинг 30 йиллиги арафасида кўтаринки руҳда ўтказилган кўрик танловнинг республика босқичида дастлаб тадбиркор ва фермер аёллар томонидан ишлаб чиқарилган маҳсулотлар кўргазмаси бўлиб ўтди. Унда тадбиркор, ишбилармон, ҳунарманд, фермер хотин-қизларнинг маҳсулотлари, айниқса, миллий йўналишдаги либослар намойиши кўрик танлов иштирокчиларида миллий ғурур, Ватанга муҳаббат, Мустақилликка бўлган шукроналик ҳиссини уйғотди. Ҳамкор ташкилотлар ва Олий Мажлис Қонунчилик палатасидаги партия фракцияси аъзоларидан иборат бўлган ҳакамлар ҳайъати иштирокчиларнинг ишлари билан яқиндан танишиб, адолатли баҳолаб боришди.
Шуни алоҳида таъкидлаш керакки ҳар бир вилоятдан энг муносиблар, кучлилар танловнинг сўнгги финал босқичига етиб келган. Энди ана шу кучлилар орасидан ғолибларни аниқлаш бир мунча мушкулроқ, албатта. Шу боисдан иштирокчиларнинг лойиҳа низомига мувофиқ, хотин-қизлар учун қўшимча янги иш ўрни яратганлиги, “Аёллар дафтари”га киритилган хотин-қизларни касб бўйича ўқитган, бандлигини таъминлаган ва ҳаётда ўз ўрнини топиб кетишида кўмаклашганлиги, фаолият туридан келиб чиқиб экспортга йўналтирилган ёки импорт ўрнини босувчи маҳсулот ишлаб чиқариш, аҳолига кўрсатаётган хизматининг сифати ҳамда фаолиятида ҳаётга татбиқ этиб келаётган янги инновацион ғоялари ҳам баҳолашда алоҳида эътиборга олинди.
Бу каби лойиҳалар жамиятда хотин-қизларнинг ўрнини мустаҳкамлаш ва фаоллигини оширишда албатта ўз самарасини беради.
Мавлуда ХЎЖАЕВА,
Олий Мажлис Қонунчилик палатаси депутати
