2025 йилдан бошлаб Mercedes-Benzнинг барча моделлари электр энергиясида ишлайдиган бўлади. Бироқ кейинги беш йил давомида компания заводлари ички ёниш двигателлари билан жиҳозланган эски моделларни ишлаб чиқаришни ҳам давом эттиради.

Компания дунё бўйича электромобиллар учун батареялар ишлаб чиқарадиган саккизта янги завод қуришни ва қувватловчи станцияларининг глобал тармоғини яратишни режалаштирмоқда. Ушбу мақсадлар учун Mercedes-Benz 40 миллиард евро ажратган.

14 июль куни Еврокомиссия иқлим ўзгаришига қарши курашиш концепциясини тақдим этди. Унинг бандларидан бири 2035 йилдан бошлаб Европа Иттифоқи ҳудудида ички ёнув двигателли автомобилларни сотишга тўлиқ тақиқ қўйишни назарда тутади.

2021 йил июнь ойи охирида Audi ички ёнув двигателли автомобиллардан воз кечишини эълон қилган эди. Компания 2026 йилдан электромобиллар ишлаб чиқаришга тўлиқ ўтишни мўлжалламоқда.